Ni mu mukino wo ku munsi wa nyuma wo mu itsinda C wakinwe kuri uyu wa Gatandatu saa Cyenda muri Stade Amahoro.
Al Hilal yatangiye umukino ihererekanya neza ndetse ku munota wa 8 yashoboraga gufungura amazamu ku mupira wari uhinduwe neza na Girumugisha Jean Claude ariko unyura impande y’izamu gato cyane.
Iyi kipe yo muri Sudani yakomeje gukina yiharira umupira cyane mu gihe FC Saint-Eloi Lupopo yo yakoreshaga uburyo bwo kwirukankana imipira iyo yabaga ibonye uburyo.
Hari aho Mohamed Yagub Abdelrhman Yousif wa Al Hilal yabonye uburyo ari mu rubuga rw’amahina ariko atinda gutera birangira bamukuyeho umupira.
Ku munota wa 30 Al Hilal yafunguye amazamu ku gitego cya Steven Ebuela warekuye ishoti ari mu nguni y’iburyo riruhukira mu nshundura.
Nyuma y’uko itsinzwe, FC Saint-Eloi Lupopo yahise ikora impinduka mu kibuga havamo Junior na Issama Mpeko hajyamo Abdoul Latif na Lumande Twite ariko ntizagira icyo zihindura.
Mbere y’uko igice cya mbere kirangira, umukinnyi wa FC Saint-Eloi Lupopo, Junior Marc yeretswe ikarita ya kabiri y’umuhondo biba umutuku ahita asohorwa mu kibuga.
Nubwo FC Saint-Eloi Lupopo yari yabonye ikarita y’umutuku yaje mu gice cya kabiri ikina yihagazeho.
Umukino warangiye Al Hilal itsinze FC Saint-Eloi Lupopo 1-0 ihita ikomeza muri ¼ cya CAF Champions League ari iya mbere mu itsinda C yarimo n’amanota 11. Yajyanye na Mamelodi Sundowns yo yasoreje ku mwanya wa kabiri n’amanota 9.
Steve Ebuela yishimira igitego yatsinze
Al Hilal yerekeje muri 1/4 cya CAF Champions League iyoboye itsinda