RFL
Kigali

Umuramyi Élysée Bigirimana wo muri Gisubizo Ministries yakoreye igitaramo mu Bubiligi-AMAFOTO

Yanditswe na: Janvier Iyamuremye
Taliki:8/09/2020 13:31
0

Umuhanzi mu ndirimbo zo kuramya no guhimbaza Imana, Élysée Bigirimana wo mu itsinda rya Gisubizo Ministries, yakoreye igitaramo gikomeye mu Bubiligi aho agiye kumara amezi umunani atuye.



Iki gitaramo cyo kwiyegereza Imana mu mashyi no mu mudiho, cyabaye ku Cyumweru tariki 06 Nzeri 2020 mu Mujyi wa Namur mu Bubiligi mu rusengero Église Missionaire de réveil ruyobowe na Apostle Vedy. 

Ni igitaramo kitabiriwe n’abantu batandukanye barimo Bishop Alexis Ndakize wahoze aririmba mu itsinda rya Alarm Ministries, akaba ari nawe warishinze.

Bigirimana yabwiye INYARWANDA ko yakoze iki gitaramo nyuma y’uko agisubitse muri Gicurasi 2020 bitewe n’icyorezo cya Covid-19 cyugarije Isi muri iki gihe, kandi gikomeje gufata indi ntera.

Avuga ko akimara gusubika iki gitaramo muri Gicurasi, yashyize imbere gukora amateraniro ku rubuga rwa Instagram. Nyuma abantu batangiye gusubira mu nsengero mu Bubiligi atangira imyiteguro yo gukora iki gitaramo.

Uyu muhanzi avuga ko iki gitaramo yagiteguye mu byumweru bibiri mbere y’uko kiba, atungurwa n’umubare w’abantu bamushyigikiye ku munsi wa mbere yakoreyeho igitaramo kuva yagera mu Bubiligi.

Ati “Nabonye Imana, abantu baraje benshi kandi hari imbogamizi nyinshi ariko baraje.” Bigirimana avuga ko yagiye mu Bubiligi ku mpamvu z’Imana, ati "Ni ho Imana yanzanye gukorera". Asanzwe afite indirimbo ‘Ku ngoma’ yakoranye na Tmc n’izindi.

Aritegura kandi gusohora amashusho y’indirimbo ‘Jesus Number One’ n’izindi ari gukorerwa na Producer Didier Touch umaze igihe kinini akorera mu Bubiligi.

Bigirimana ni umwe mu nkingi za mwamba z’itsinda Gisubizo Ministries rizwi mu ndirimbo zirimo; 'Nguhetse ku mugongo', 'Amfitiye byinshi', ‘Uzandengere Mana’, ‘Hallelluya’, ‘Nsinzahwema’, 'Ntidufite gutinya' bakoranye na Gentil Misigaro, n’izindi zakomeje izina ry’iri tsinda.

Uyu muhanzi winjiye muri Gisubizo Ministries mu 2005, avuga ko akibarizwa muri iri tsinda n’ubwo ubu ari kubarizwa mu Bubiligi. Yavuze ko yatangiye urugendo rwe rw’umuziki nk’umuhanzi wigenga, ariko ko yishimira buri ntambwe yateranye na Gisubizo Ministries.

Ati “Ibihe nibuka n’uko Gisubizo Ministries twigeze kujya mu marushanwa umunsi umwe dutahana ibikombe bine. Ntibyari bisanzwe. Nibuka ukuntu twatangiriye munsi y’igiti. Imana iratangaje". 

Élysée Bigirimana ni ubuheture mu muryango w’abana barindwi. Ni umugabo wubatse ufite umugore witwa Christine n’abana batatu; David, Davina na Destiny.

Umuramyi Elysee yakoreye igitaramo gikomeye muri Eglise Missionaires des Reveil

Bishop Alexis Ndakize watangije Alarm Ministries yafatanyije na Bigirimana guhimbaza Imana mu gitaramo cye

Iki gitaramo kitabiriwe n'umubare munini n'ubwo ari mu bihe byo kwirinda Covid-19

Abakobwa b'abaririmbyi bafashishije mu miririmbire Elysee Bigirimana

Bigirimana inkingi ya mwamba mu Gisubizo Ministries amaze amezi umunani abarizwa mu Bubiligi

Bigirimana na Alexis Ndakize mu gitaramo cyo ku Cyumweru tariki 06 Nzeri 2020

Apostle Vedy uyobora urusengero Eglise de Missionaries de Reveil yabwirije muri iki gitaramo






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND