RFL
Kigali

Perezida Vladimir Putin yatangaje ko Uburusiya bubaye igihugu cya mbere cyemeje urukingo rwa Covid-19

Yanditswe na: Soter Dusabimana
Taliki:11/08/2020 14:25
0


Ku uri uyu wa Kabiri Perezida w’u Burusiya Vladimir Putin yatangaje ko igihugu cye cyibaye icya mbere ku isi mu kwemeza urukingo rwa Covid-19, nyuma y’igihe cyiri munsi y’amezi ruri mu igeragezwa ku bantu.



Inkuru dukesha ibiro ntaramakuru by’Abongereza Reuters avuga ko igihugu cy’u Burusiya cyabaye icya mbere mu kwemeza urukingo rwa Covid-19 nk'uko byatangajwe na Perezida w’iki gihugu Vladimir Putin kuri uyu wa Kabiri. Uru rukingo ngo rwari rumaze igihe cyiri munsi y’amezi abiri ruri mu igeragezwa ku bantu.

Iyi ntambwe Uburusiya bwateye ni imwe mu ngingo bavuga ko igaragaza ubushobozi urwego rwabo rw’ubushakashatsi rugezeho. Kuri uyu wa kabiri ubwo Perezida Vladimir Putin yari mu nama n’abagize guverinoma nibwo yatangaje aya makuru, anashimira abantu bose bagize uruhare mu kugirango uru rukingo ruboneke.

Amakuru avuga ko minisiteri y’ubuzima muri icyi gihugu yamaze kwemeza uru rukingo aho yavuze ko uru rukingo bateganya ko ruzatanga ubwirinzi (Immunity) mu guhe cy’imyaka ibiri. Perezida Putin yagize ati: ”Ndizera ko mu gihe gito kiri imbere tugiye gutangira kongera umubare wuru rukingo”.  Yavuze kandi ko ibi bibaye intambwe y’ingenzi ku isi yose.

Perezida Putin yavuze kandi ko umwe mu bakobwa be yamaze guhabwa uru rukingo kandi ko uyu mukobwa yagize uruhare mu igeragezwa ryarwo. Nyuma yavuze ko umunsi uyu mukobwa we yahereweho uru rukingo yari afite umuriro uri ku kigera cya degree celcius 38, nyuma uragabanuka ugera hejuru gato ya degree celcius 37 ku munsi wakurikiyeho. Yakomeje agira ati: ”Ubu ameze neza kandi afite umubare munini w’abasirikare” gusa nta zina ry'umwe mu mukobwa be babiri wahawe uru rukingo yigeze atangaza, abakobwa be babiri ni bo Mariya Putina na Yekaterina Putina.  

Leta y’Uburusiya yavuze ko abakora mu rwego rw’ubuvuzi, abarimu n’abandi bose bashobora kwandura icyi cyorezo mu buryo bworoshye aribo bazaherwaho mu guhabwa uru rukingo. Uwungirije Minisitiri w’intebe Tatyana Golikova yavuze ko guha abaganga uru rukingo bizatangira mu nsi micye iri imbere muri kuno kwezi turimo.

Professor Alexander Gintsburg uhagarariye ikigo cya Gamaleya Institute cyakoze uru rukingo yavuze ko gutanga uru rukingo bigeye gutangira nubwo igerageza rya gatatu rigikomeje. Yakomeje avuga ko ku nshuro ya mbere hazatangwa inkingo mu duce tugera 10-15 mu bice bigera kuri 85 bigize icyi gihugu.

Leta y’uburusiya ivuga ko umubare munini w’uru rukingo uzatangira gukorwa mu kwezi gutaha kwa Nzeri naho umubare munini w’abaturage bakazatangira kuruhabwa mu kwakira. Icyi gihugu ni kimwe mu bihugu bwagize umubare munini w’abanduye icyi cyirezo cya Covid-19 aho mu mibare itangazwa igaragaza ko handuye abagera ku 897,599 hapfa abagera 15,131.

Nk'uko bitangazwa n’ishami ry’umuryango w’abibumbye rishinzwe ubuzima ku isi WHO rivuga ko ku isi yose hari inkingo zirenga 100 ziri gukorwa mu rwego rwo guhangana na Covid-19, muri izi nkingo izigera kuri 4 zigeze mu cyiciro cya gatatu cyo gusuzumirwa ku bantu.

Src: Reuters & abc News & Daily Mail  






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND