Tik Tok yiyemeje gutanga agera kuri Miliyari $3 ku banyempano inatangaza ihangana ryayo na youtube na Instagram

Nyuma y'uko ikigo cya Byte dance kibonye ko urubuga rwacyo rwa tik tok rumaze kwamamara binyuze mu bwinshi bw'amashusho anyuzwa kuri uru rubuga, bagiye gutangira gufasha abanyadushya barukoresha kubona amafaranga. Uru rubuga rugiye gutanga amafaranga angana na miliyari $3 mu gihe kingana n’imyaka 3.

Kuri iyi nshuro, ubuyobozi bwa Tik Tok bwatangaje ko bugiye gukora ibishoboka byose kugira ngo bigarurire abantu benshi baruta abakoresha za Instagram na Youtube.

Iki kigo cyatangaje uburyo kizagenda gitangamo amafaranga, mu gihugu cya Leta Zunze Ubumwe za Amerika bazahatanga agera kuri miliyari $1 naho ku mugabane w’uburayi mu mwaka wa mbere bazatanga agera kuri miliyoni $70, gusa kuri uyu mugabane bari gupanga kuzahatanga agera kuri miliyoni $300.

Iki kigo gitangaza ko abantu bakoresha uru rubuga kugira ngo bazajye babona aya mafaranga bizajya bibasaba kwaka ubusabe nyuma bamara kwemererwa bakazajya bahembwa hagendewe ku mikorere ndetse bakajya bahembwa buri gihe. General Manager wa Tik Tok Vanessa Pappas abinyujije ku rubuga rw’iki kigo yagize ati: “Umugambi dufite ni uwo guha amafaranga abanyadushya bakoresha urubuga rwacu”.

Tik Tok mu myaka igera kuri 4 ishize imaze kumanurwa (Downloads) n’abasaga miliyari 2, uyu muvuduko urubuga rwa Tik Tok rufite mu kwigarurira imitima ya benshi ni bimwe mu bitera umutwe abayobozi b'ibigo nka Facebook na Google byari bimaze kwifatira Isi mu biganza.

Umuyobozi mu kigo cya Tik Tok ushinzwe ubushakashatsi Michael Norris yagize ati ”Twizeye ko mu gihe tuzaba tumaze gutangira guha amafaranga abakoresha uru rubuga bizakurura n’abandi banyadushya benshi”.  

Src: cnbc.com