RFL
Kigali

Premier League: Umunsi wa nyuma wasize Manchester United na Chelsea zibonye itike ya UEFA Champions League

Yanditswe na: SAFARI Garcon
Taliki:27/07/2020 13:39
0


Kuri iki cyumweru tariki ya 26 Nyakanga 2020, Mu Bwongereza basoje Shampiyona y’icyiciro cya mbere izwi nka ‘Premier League’ umwaka w’imikino 2019-2020, amakipe ya Chelsea na Manchester United arokokera ku munsi wa nyuma yizera kuzakina irushanwa rya UEFA Champions League mu mwaka utaha.



Manchester United yari ifite urugamba rukomeye ku kibuga cya Leicester City, gusa ikaba yitwaye kigabo iyitsindira iwayo ibitego 2-0 bituma isoza ku mwanya wa 3 wayihesheje uburenganzira bwo kuzakina UEFA Champions League mu mwaka utaha w’imikino.

Manchester United yatsinze uyu mukino ibifashijwemo na Bruno Fernandes watsinze igitego cya mbere kuri penaliti yakorewe kuri Anthony Martial ku munota wa 71 hanyuma Jesse Lingard wari umaze igihe kirekire adatsindira iyi kipe, yatsinze igitego ku munota wa 90 abifashijwemo n’umunyezamu Kasper Schmeichel washatse kumucenga akamwambura umupira agatsinda.

Leicester City yarangije umukino ari abakinnyi 10 kuko myugariro wayo Jonny Evans yakoreye ikosa rikomeye Scott McTominay.

Iyi kipe itozwa na Ole Gunnar yatangiye nabi shampiyona ndetse yigeze no kugera ku mwanya wa 15, yarangije ku mwanya wa 3 n’amanota 66 yanganyaga na Chelsea ariko ikaba izigamye ibitego byinshi kuko izigamye 30 kuri 15 bya Chelsea.

Umukino wa Chelsea FC na Wolverhampton, nawo wari usobanuye byinshi kuri Chelsea yashakaga itike ya Champions League, ukaba warangiye Chelsea itsinze ibitego 2-0 ibifashijwemo na Mason Mount kuri coup Franc ku munota wa 45 na Olivier Giroud mu minota 3 y’inyongera y’igice cya mbere.

Uko Shampiyona yasojwe

Amakipe azakina Champions League:Liverpool, Manchester City,Manchester United na Chelsea.

Azakina Europa League: Leicester&Tottenham.

Ayamanutse: Bournemouth,Watford na Norwich City.

Umuzamu wakinnye imikino myinshi atinjizwa igitego na kimwe (clean sheet) yabaye Ederson Moraes wa Manchester City. Imikino atinjijwe igitego ni 16 mu mikino 35 yakinnye.

Umukinnyi watsinze ibitego byinshi (top scorer) muri shampiyona ya 2019-2020 yabaye Jamie Richard Vardy ukinira Leicester watsinze 23 arusha 1 Pierre Emerick Aubameyang wa Arsenal.

Vardy yakoze agahigo ko kuba umukinnyi wa mbere wegukanye igihembo cy’umukinnyi ufite ibitego byinshi mu mwaka w’imikino umwe kurusha abandi akuze ku myaka 33. Aka gahigo kaherukaga gushyirwaho na Drogba wabikoze afite imyaka 32 muri 2009-2010.

Kevin de Bruyne yaciye agahigo ko gutanga imipira 20 yavuyemo ibitego mu mwaka umwe w’imikino ndetse yanabashije gutsinda ibitego 13.

Umunya-Espagne David Silva yakinnye umukino we wa nyuma muri Manchester City.

Chelsea yabonye itike yo kuzakina Champions League nyuma yo gutsinda Wolves

Nyuma y'igihe kirekire Manchester United yasubiye muri Champions League







TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND