Kim Jon un yakoresheje inama y’igitaraganya nyuma y'uko Koreya ya ruguru itangaje ko ifite umuntu wa mbere urwaye covid-19

Inkuru itangazwa n’igitangazamakuru KCNA cya leta ya Koreya ya ruguru ivuga ko umuntu wari waratorotse akajya muri Koreya y'Epfo mu myaka itatu ishize, mu cyumweru gishize yagarutse mu gihugu anyuze mu mu gace kagabanya ibi bihugu yagaragaje ibimenyetso bya Covid-19.

Bwana Kim Jong-un, uyobora iki gihugu nyuma yo kumva iyi nkuru yahise akoresha inama y’igitaraganya hamwe n'abategetsi bakuru, ategeka ko akarere k'umujyi wa Kaesong uri ku mupaka gashyirwa muri gahunda ya 'guma mu rugo'.

Koreya ya ruguru ubusanzwe ni igihugu kizwiho ko ibintu byinshi biba biri mu bwiru bukomeye cyane, ni kenshi iki gihugu cyagiye gitangaza ko ko nta muntu n'umwe wanduye Covid-19 uharangwa, ariko benshi mu basesenguzi bakavuga ko ari ibintu bisa nk'ibidashoboka.

Bimwe mu bitangazwa na KCNA igitangazamakuru cya leta ya Korea ya ruguru:

"Habaye igikorwa cyihutirwa mu mujyi wa Kaesong aho umuntu wari waragiye mu Majyepfo mu myaka itatu ishize, umuntu ucyekwa ko yanduye virusi yagarutse ku itariki ya 19 y'ukwezi kwa karindwi nyuma yo kwambuka umurongo w'umupaka mu buryo bunyuranyije n'amategeko".

Mu nama yabaye ejo ku wa Gatandatu y'abagize biro nkuru ya politike y'ishyaka riri ku butegetsi, Bwana Kim yategetse ko hafatwa "ingamba zihutirwa zikaze cyane ku kigero cyo hejuru gishoboka" mu rwego rwo guhashya iyi virusi.

Igitangazamakuru KCNA cyongeyeho ko Bwana Kim yanatangije iperereza ku kuntu uwo muntu yashoboye kwambuka uwo mupaka urinzwe bikomeye, aburira ababigizemo uruhare ko hari "igihano gikaze" kibategereje.

Ku rundi ruhande, mu minsi ya vuba ishize Koreya ya ruguru ntiyigeze itangaza amakuru n'amwe y'uko hari umuntu wambutse umupaka mu buryo bunyuranyije n'amategeko.

Kuva mu mezi atandatu ashize ubwo coronavirus yakwiraga mu bice bitandukanye ku isi, Koreya ya ruguru yafunze imipaka yayo ndetse ishyira mu kato abaturage babarirwa mu bihumbi. Mu ntangiriro y'uku kwezi kwa karindwi, Bwana Kim yashimagije "intsinzi ikomeye" y'iki gihugu mu guhangana na Covid-19.

Src: bbc