Xavi wabiciye bigacika muri FC Barcelone yasanzwemo Coronavirus

Xavi w’imyaka 40 y’amavuko, kuri ubu abarizwa muri Qatar aho atoza ikipe ya Al Sadd, ndetse ikaba ari ikipe yihagazeho ku mugabane wa Aziya dore ko ifite ijambo rikomeye mu marushanwa ahuza amakipe yabaye ayambere iwayo.

Mu mwaka ushize ikipe Xavi atoza yatsindiwe ku mukino wa nyuma muri Champions League yo muri Aziya itakaza igikombe, gusa ariko uyu munya-Espagne ni umwe mu bakunzwe cyane muri icyo gihugu dore ko aherutse no kongererwa amasezerano.

Mu butumwa yashyize kuri Instagram, Xavi yatangaje ko yanduye Coronavirus, ariko ubu ari kumererwa neza.

Ati “Mu minsi mike ishize, bijyanye n’amabwiriza yashyizweho na QSL (Qatar Stars League), ibipimo biheruka gufatwa byagaragaje ko nanduye Covid-19”.

“Ku bw’amahirwe ndumva meze neza, ariko nzakomeza kuba mu kato kugeza igihe nemerewe kujya aho abandi bari".

Xavi yari amaze iminsi ategurira ikipe ye kwitabira isubukurwa rya Shampiyona ya Qatar, yasubitswe muri Werurwe. Uyu mugabo wabaye umukinnyi ukomeye mu kibuga hagati ntazashobora no gukurikirana imyitozo mu gihe azamara mu kato, kuko inshingano z’ubutoza zasigaranye umutoza w’ikipe ya kabiri ya Al Sadd, David Prats.

Hamaze iminsi havugwa amakuru ko Xavi ashobora kugirwa umutoza mushya wa FC Barcelone, asimbuye Quique Sétien utorohewe nyuma yo kubura igikombe cya shampiyona muri uyu mwaka w’imikino, gusa bikavugwa ko mu gihe Xavi ashobora kuboneka nyuma y’umwaka utaha w’imikino, Umufaransa Laurent Blanc ni we uhabwa amahirwe yo gutoza FC Barcelone.

Imibare yakusanyijwe na Kaminuza ya Johns Hopkins, igaragaza ko Qatar imaze kugira abarwayi ba Coronavirus ibihumbi 108 mu gihe abahitanywe n’iki cyorezo ari 164.

Xavi wavugwaga muri FC Barcelona yasanzwemo Coronavirus