APR FC yatandukanye na Nabyl Bekraoui wari umutoza wungirije

Mu minsi ishize havuzwe amakuru ko Dr Nabyl Bakroui wari umutoza wungirije muri APR FC yatandukanye nayo, ariko icyo gihe APR FC yanyomoje ayo makuru yemeza ko ari ibihuha kuko Nabyl akiri umutoza wayo, kera kabaye umutoza Dr Nabyl ubwe yitangarije ko yamaze gutandukana n’ikipe ya APR FC.

Dr. Nabyl usanzwe anakora akazi ko kongerera ingufu abakinnyi, abinyujije ku rukuta rwe rwa Instagram yatangaje ko yatandukanye n’iyi kipe, ariko ntiyatangaje impamvu zatumye asezera, akaba yashimiye buri wese bakoranye muri iyi kipe.

Yagize ati “Kuri APR FC, mbabajwe no kubasangiza amakuru ko ntazakomezanya n’iyi kipe nziza, umuryango wanjye na njye twishimiye buri munota twamaranye namwe ndetse no gushyigikira APR FC”.

“Tugiye dufite umutima wuzuye ibyishimo n’urwibutso rwiza twagiranye na APR FC. Ndabashimira urukundo rutagabanyije mwatweretse n’uburyo mwadushyigikiye”.

“Ndashaka gushimira abakinnyi ku bunyamwuga bwabo n’uburyo bitangira akazi. Ndashimira kandi ubuyobozi bwa APR FC n’amahirwe bwampaye. Mu mutima wanjye, APR FC izahora ikunzwe”.

Dr. nabyl avuye muri APR FC atwaranye nayo Igikombe cya Shampiyona, Igikombe cy’Ubutwari 2020 n’Irushanwa rya Gisirikare ryabereye muri Kenya muri Kanama 2019.

Ubutumwa bwa Dr. Nabyl asezera kuri APR FC