Umuteramakofi Conor MacGregor yatangaje ko yamaze gusezera ku mukino w’iteramakofi

Conor Anthony MacGregor yavutse kuwa 14 Nyakanga 1988 i Crumlin muri Irelande. Uyu mugabo akaba yarakinaga nk’uwabigize umwuga mu mikino njyarugamba n’iteramakofi. Ku myaka 12 gusa y’amavuko ni bwo yatangiye gukina umukino w’iteramakofi muri Club yitwa Crumlin Boxing Club mu gace k’iwabo.

Mu mwaka 2006 we n’umuryango we baje kwimukira mu mujyi wa Dublin, ari bwo yaje guhura na Tom Egan wakinaga mu mikino ya UFC (Ultimate Fighting Championship) batangira kwitozanya hamwe bombi. Nyuma yaho yakomeje kujya yitabira amarushanwa menshi atandukanye.

Umukino watumye abantu benshi bamumenya ni uwabaye kuwa 26 Kanama 2017, ubwo yarwanaga n’umukinnyi w’iteramakofi muri Leta Zunze Ubumwe za Amerika, Floyd Mayweather umukino wabereye muri T-Mobile Arena muri Nevada urangira uyu mugabo atsinzwe na Floyd Mayweather kuri round ya cumi. Uyu mukino wahuje aba bagabo wabaye umwe mu mikino y’iteraramakofi yahenze cyane.

Umukino wahuje MacGregor na Mayweather muri 2017 ni umwe mu mikino y’iteramakofi yahenze cyane

Ku myaka ye 31 y’amavuko uyu mugabo yatangaje ko yamaze gusezera ku mikino ya UFC (Ultimate Fighting Championship) yakinaga nk'uwabigize umyuga. Uyu mwanzuro wo gusezera kuri uyu mwuga we si ubwa mbere awufashe, dore ko yigeze kubitangaza no muri Mata umwaka ushize nyuma akaza gukomeza amezi agera kuri cumi n’abiri.

Ku butumwa yacishije ku rukuta rwe rwa Twitter yatangarije abamukurikira ko yamaze gufata icyemezo cyo guhagarika imikino yo kurwana (Fighting), anabashimira ku bw’ibihe byiza bagiranye. Uyu mugabo mu myuga we, mu mikino yakinnye akaba yaratsinze igera kuri 22 agatsindwa 4. Nyuma y'uko atangaje ko yahagaritse gukina mu mwaka washize akaza kugaruka, McGregor yagiye asubira inyuma cyane mu mirwanire ugereranyije no mu myaka itatu ishize.

Ubutumwa Conor MacGregor yanyujije ku rukuta rwe rwa Twitter

 Src: skynews

Umwanditsi: Soter DUSABIMANA-InyaRwanda.com