Kuri uyu wa Gatatu tariki 25/03/2020 mu Rwanda habonetse umuntu umwe gusa wasanzwemo indwara ya COVID-19, wiyongereye ku bantu 40 bityo abamaze kwandura bose hamwe akaba ari 41.
Minisiteri y'Ubuzima mu Rwanda (MINISANTE) yatangaje ko uyu muntu wasanzwemo iyi ndwara, yaje mu Rwanda aturutse i Dubai, ahita ashyirwa mu kato. Yatangaje ko "Abarwayi bose bavurirwa ahantu habugenewe kandi bari koroherwa. Nta n'umwe urembye". Ikindi iyi Minisiteri yatangaje ni uko hashakishijwe n'aba bantu kugira ngo basuzumwe ndetse bitabweho n'inzego z'ubuzima.
MINISANTE yasabye abaturarwanda bose gukomeza kwitwararika. Yabibukije gukomeza kubahiriza amabwiriza y'inzego z'ubuzima mu kwirinda iki cyorezo hitabwaho cyane cyane gukaraba intoki kenshi kandi neza hanubahirizwa intera ya metero imwe (1) hagati y'abantu. Yibukije kandi "Gushyingura kimwe n'andi mahuriro y'abantu benshi yihutirwa ntabwo agomba kurenza abantu icumi (10)".
Ibimenyetso by'iyi ndwara ni; inkorora, guhumeka bigoranye n'umuriro. Umuntu wese ugaragaza ibi bimenyetso, arasabwa kwihutira guhamagara nimero itishyurwa ya 114 cyangwa akipimisha akoresheje telefone ngendanwa akanda *114# maze agakurikiza amabwiriza. Ashobora kandi kohereza ubutumwa bugufi kuri Email: callcenter@rbc.gov.rw cyangwa akoreheza ubutumwa bwa Whatsapp kuri +250788202080.
Itangazo rya Minisiteri y'Ubuzima
Eng
RSS 
TANGA IGITECYEREZO