RFL
Kigali

OMS irasaba urubyiruko kwitwararika cyane n'ubwo impuzandengo y’imyaka y'abamaze guhitanwa na coronavirus ari 78.5

Yanditswe na: Eric Misigaro
Taliki:22/03/2020 12:23
0


Ishami ry'Umuryango w'Abibumbye ryita ku buzima (OMS/WHO) rirasaba urubyiruko ko rutagomba guterera agati mu ryinyo n'ubwo iyi ndwara irimo guhitana abantu bakuze cyane ndetse ko rugomba kwirinda ibikorwa by'imyidagaduro mu kwirinda gukwirakwiza iki cyorezo cyugarije Isi.



Dr Tedros Adhanom Ghebreyesus, Umuyobozi Mukuru wa WHO yatangaje ko ibikorwa urubyiruko rukora bishobora kuruviramo urupfu cyangwa gukira".

Yavuze aya magambo kubera hari urubyiruko rwo mu bihugu byinshi ruri kutumva amabwiriza ajyanye no kwirinda Covid-19, rwitwaje ko abageze mu zabukuru ari bo ikunze kwibasira nk'uko bigaragara kumibare.

Iyi ndwara ya Covid-19 ni ubwoko bushya bwa coronavirus dore ko mbere yigeze kugariza Isi ahagana muri 2003, gusa ntabwo yari ifite ingufu nk'izo iyi ifite ubu kuko mbere yari yibasiye u Bushinwa gusa. Ariko ubu Uburayi ni bwo bwahindutse izingiro ry'iki cyorezo ndetse no mu bindi bice by’Isi.

Mu Butaliyani - iyi virusi imaze kwica abantu benshi cyane kurusha mu bindi bihugu byose byo ku Isi-umubare w'abo imaze kwica urangana na 4,825, aho kuwa 21 Werurwe 2020 yahitanye abasaga 793.

Magingo aya ibihugu by’Afrika biri gukora iyo bwabaga ngo birebe ko iki cyorezo kitawuzahaza kuko ubu ari wo mugabane utarashegejwe n’iki cyorezo. Ku bw'iyi mpamvu hari benshi babanje kujya bibeshya ko iki cyorezo kidafata abirabura.

Ubu Isi yose ihanze amaso umuntu wagaragaza umuti cyangwa urukingo rw’iki cyorezo, gusa n'ubwo benshi bategereje umuti hari ibihugu bimaze kuvuga ko umuti uhari kandi uri mu nzira zo kujya ahagaragara. 

Ibi bihugu bivuga ko uyu muti uri mu igeragezwa ryimbitse. Ababitangaje twavugamo nk’igihugu cy’u Bushinwa, Israel ndetse n’u Buyapani. Gusa n'ubwo ibi bihugu biri kuvuga gutya ntabwo biratanga igihe iyi miti iri gukorwa n’intiti izagira ahagaragara.  

WHO iratangaza iki?

Ubwo yari mu kiganiro n'abanyamakuru hifashishijwe murandasi ari ku cyicaro cya WHO i Genève mu Busuwisi, Bwana Tedros yagize ati: "N'ubwo abageze mu zabukuru ari bo bibasirwa cyane, ntibivuze ko urubyiruko rutayirwara".

Yunzemo agira ati: "Mfitiye ubutumwa urubyiruko: Ntabwo muri ntakorwaho, iyi virusi ishobora gutuma mujya mu bitaro mukahamara ibyumweru cyangwa ikanabica. Nubwo mutayirwara kandi, amahitamo yanyu ku ho mujya ashobora kuviramo undi muntu urupfu cyangwa gukira".

Bwana Tedros yishimiye amakuru y'uko mu mujyi wa Wuhan mu Bushinwa aho iyi virusi yatangiriye, nta bantu bashya bari kwandura iyi ndwara muri iyi minsi. Yavuze ko ibyo "bitanga icyizere ko n’ahandi hasigaye ku isi ko n'ubwo ibintu bimeze nabi cyane bishobora guhindurwa".

Ubushakashatsi buvuga iki?

Ubushakashatsi butandukanye bugaragaza ko abantu b'ingero zose bashobora kwandura iyi virusi - ariko by'umwihariko ikibasira abantu bageze mu zabukuru ndetse n'abasanzwe bafite ubundi burwayi. Muri rusange, abo Covid-19 yishe mu Butaliyani bafite imyaka (mpuzandengo) 78.5.

Abayirwaye batageze no kuri 1% bafite munsi y'imyaka 50 y'amavuko ni bo yishe mu Bushinwa, nk'uko bitangazwa n'ikinyamakuru The New York Times. Ariko yishe abagera hafi kuri 15% by'abayirwaye bari bafite imyaka iri hejuru 80 y'amavuko.

WHO ubu iri kugira inama abantu yo "kutegerana" mu rwego rwo kwirinda ikwirakwira ry'iyi virusi, nkuko bitangazwa n'ibiro ntaramakuru Reuters.

Dr Maria Kerkhove, umukozi wa WHO ushinzwe kurwanya indwara z'ibyorezo, yabwiye Reuters ati: "Turashaka ko abantu bakomeza gusabana".

Madamu Kerkhove, yongeyeho ati: "Rero mushake uburyo [bushya] bwo kubikoramo, mubushakire nko mu gukoresha internet ndetse n'imbuga nkoranyambaga zitandukanye, kubera ko ubuzima bwanyu bwo mu mutwe muri iki gihe [cy'iki cyorezo] ni ngombwa nkuko ubuzima bwo ku mubiri nabwo ari ngombwa".

Src: bbc.com






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND