Tour du Rwanda 2020: Hamenyekanye batanu bagize Team Rwanda ifite intego yo kwegukana irushanwa- AMAFOTO

Ni umuhango wari witabiriye n’abayobozi bakuru muri iri shyirahamwe ndetse n'abo muri Minisiteri ya Siporo, aho umutoza mukuru wa Team Rwanda Magnell Sterling yerekanye abakinnyi 5 bazahagararira u Rwanda muri Tour du Rwanda ya 2020, ndetse banagaragaza imyambaro bazakina bambaye.

Tour du Rwanda irabura iminsi ibarirwa ku ntoki ngo itangire gukinwa, dore ko isiganwa nyirizina rizatangira tariki 23 Gashyantare 2020, aho abasiganwa bazazenguruka twinshi mu turere tw’u Rwanda mu gihe cy’iminsi umunani irushanwa riteganyijwe kuzamara.

Aba bakinnyi bagize Team Rwanda bayobowe na Mugisha Samuel, ni we Munyarwanda uheruka kwegukana Tour du Rwanda. Kuba yaratangiranye n’umutoza mu myitozo yitegura iri rushanwa kuva tariki ya 1 Ugushyingo 2019, ngo bizafasha uyu musore kuyobora bagenzi be neza.

Mu bandi bakinnyi bari muri Team Rwanda uyu mwaka, ni Gahemba Bernabe ni we ukiri muto kurusha abandi akaba ari n’ubwa mbere agiye gukina iri siganwa.

Harimo Uwizeye Jean Claude wegukanye umwanya wa kabiri muri Tour du Rwanda 2018, Nsengimana Jean Bosco watwaye iri siganwa muri 2015 na Areruya Joseph waritwaye muri 2017.

Staff Technique ya Team Rwanda:

Igizwe n’umutoza wa Team Rwanda, Magnell Sterling, Umukanishi Maniriho Eric na Ruvogera Obed umuganga.

Tour du Rwanda 2020 izaba iri kuba ku nshuro ya kabiri nyuma yo gushyirwa ku kigero cya 2.1 izanyura mu mijyi itandukanye, aho agace karekare ari aka kane kazava Rusizi kerekeza I Rubavu ku ntera ya kilometero 206,3.

Tour du Rwanda y’uyu mwaka, izitabirwa n’amakipe 16 arimo atatu azahagararira u Rwanda, ari yo Team Rwanda, Benediction Ignite na SACA (Skol and Adrien Cycling Academy).

Isiganwa ry’amagare 2020 rigiye kuba ku nshuro ya 12, rizatangira ku itariki 23 Gashyantare aho rizasozwa ku itariki ya 1 Werurwe 2020, rikazibirwa n’amakipe y’ibihugu birimo u Rwanda, Algerie, Ethiopie na Erythrée.

Inzira za Tour du Rwanda 2020:

Agace ka 1: kuwa 23 Gashyantare 2020: Kigali Arena-Kimironko: 114,4 Km

Agace ka 2: kuwa 24 Gashyantare 2020: Kigali-Huye: 120,5 Km

Agace ka 3: Kuwa 25 Gashyantare 2020: Huye-Rusizi: 142,0 Km

Agace ka 4: Kuwa 26 Gashyantare 2020: Rusizi-Rubavu: 206,3 Km

Agace ka 5: Kuwa 27 Gashyantare 2020: Rubavu-Musanze: 84,7 Km

Agace ka 6: Kuwa 28 Gashyantare 2020: Musanze-Muhanga:127,3 Km

Agace ka 7: Kuwa 29 Gashyantare 2020: Nyamirambo (Intwari) - Kwa Mutwe - Kuri 40: 4,5 Km.

Agace ka 8: Kuwa1 Werurwe 2020: Kigali Expo Ground-Rebero: 89,3 Km

Mugisha Samuel na bagenzi be bafite inyego yo kwegukana iri rushanwa

Areruya, Mugisha Samuel, Gahemba Barnabe, Uwizeyimana Jean Claude na Nsengimana Jean Bosco nibo bagize Team Rwanda

Umutoza w'ikipe y'u Rwanda Sterling