Ku myaka 38, Zlatan Ibrahimovic yasubiye muri AC Milan

Ibrahimovic w’imyaka 38 y’amavuko, nta kipe yagiraga nyuma yo gutandukana na LA Galaxy yo muri Major League Soccer muri Leta Zunze ubumwe za Amerika, aho yavuye atsindiye iyi kipe ibitego 53, akaba muri niki gihe yigurishaga, ikipe yamwifuzaga yaganiraga na nyirubwite gusa nta rundi ruhande abanje kunyuraho.

Ubuyobozi bw’ikipe ya AC Milan butangaza ko Ibrahimovic azasesekara mu mujyi wa Millan Ku wa Kane tariki 02 Mutarama 2020, agiye gukora ikizamini cy’ubuzima.

Nyuma yo kumvikana na AC Milan, akaba agiye kugaruka mu ikipe aheruka gukinira mu mwaka wa 2012, Zlatan yagize ati”Ngarutse mu ikipe nubaha, ndetse no mu mujyi wa Milan nkunda”.

Ibrahimovic aheruka muri shampiyona y’ubutaliyani akinira ikipe ya AC Millan mu mwaka wa 2010-2012, akaba yarakiniye AC Millan imikino 61 atsinda ibitego 42 muri shampiyona.

Yagiye muri LA Galaxy yo muri Major League Soccer mu mwaka wa 2018, akaba mu gihe yari ahamaze yarayitsindiye ibitego 53, ndetse agaragara mu ikipe y’abakinnyi 11 beza muri Leta Zunze ubumwe za Amerika mu mwaka wa 2018.

Zlatan Ibrahimovic asanze AC Milan iri ku mwanya wa 11 muri shampiyona y’ubataliyani, akaba kandi ahasanze umutoza mushya Stefano Pioli  nyuma yuko Marco Giampaolo watozaga iyi kipe yirukanwe mu Ukwakira 2019 nyuma y’amezi ane yari amaze ayitoza.

Mu 2010, Zlatan yafashije AC Milan gutwara igikombe cya shampiyona 2009-2010 mbere yo kubasinyira andi masezerano muri Kamena 2011, akaba yarayitsindiye ibitego ibitego 56 mu mikino 85 yakinnye, nyuma yahise yerekeza muri PSG.

Zlatan  kandi yakiniye amakipe arimo  Malmo FF (1999-2001), Ajax (2001-2004), Juventus (2004-2006), Inter Milan (2006-2009) mbere yo gukina muri FC Barcelona (2009-2011).

Ibra Kadabra yamaze kumvikana na AC Milan kuzayikinira amezi atandatu ashobora kongerwa

Ubwo Zlatan aheruka muri Milan AC yahagiriye ibihe byiza

Ibrahimovic yabaye umukinnyi ngenderwaho muri AC Millan kuva 2010-2012