Agaciro Basketball Tournament: Patriots yatsinze Espoir igera ku mukino wa nyuma

Muri uyu mukino wasoreje indi yabaye kuri uyu wa Gatanu, Patriots BBC yatsinze agace ka mbere ku manota 22-9 ibifashijwemo n’abakinnyi bayo b’intarumikwa barimo Ndayisaba Dieudonné na Pegues Darrius,

Nijimbere Guibert, Ruzigande Ally na Makiadi Michael bafashije Patriots gukomeza kuyobora umukino mu gihe abakinnyi barimo Kamilindi Oliveri bafashije Espoir kuzamura amanota nubwo agace ka kabiri nubundi karangiye Patriots ibarusha amanota 22 kuko byari 42-20, abakinnyi bajya mu kiruhuko cy’igice cya mbere.

Patriots BBC yatsinze amanota 22-14 mu gace ka gatatu, mu gihe mu gace ka kane ari nako ka nyuma yatsinzemo 26-13 bituma umukino wose urangira ibonye tike y’umukino wa nyuma itsinze Espoir BBC amanota 89-47.

Patriots BBC itegereje ikipe bizahura ku mukino wa nyuma, ikaza kumenyekana kuri uyu wa gatandatu hagati ya REG BBC na APR BBC zikinira muri Petit Stade saa 20:00. Umukino wa nyuma biteganyijwe ko uzakinirwa muri Kigali Arena ku wa Gatanu w’icyumweru gitaha, tariki ya 29 Ugushyingo.

Mu bagore, APR WBBC yageze ku mukino wa nyuma itsinze Ubumwe BBC amanota 67-43. Undi mukino urahuza The Hoops na RP-IPRC Huye WBBC kuri uyu wa Gatandatu saa 18:00.

Mu ngimbi, Team Elite yatsinze Rafiki Kids amanota 84-72.

Ikipe ya mbere mu bagabo no mu bagore izahembwa igikombe izahembwa igikombe na Miliyoni ebyiri z’amafaranga y’u Rwanda (2,000,000 Rwf), mu gihe ikipe ya kabiri mu byiciro byombi izahembwa ibihumbi 500,000Rwf, ikipe ya mbere mu bakiri bato (U17) izahembwa igikombe ndetse n’inkweto.

Imikino iteganyijwe kuri uyu wa Gatandatu tariki 23 Ugushyingo 2019 – Petit Stade

4Pm Gikondo Boys vs The Hoops

6Pm The Hoops vs RP- IPRC Huye

8Pm REG BBC vs APR BBC Men

Amakipe arahatanira Miliyoni 2 z'amanyarwanda muri iri rushanwa

Ikipe ya Patriots BBC yatsinze umukino ku buryo butayigoye cyane

Espoir BBC ikunze kugora amkipe abiri akomeye mu Rwanda

Ni umukino Patriots yigaragaje cyane

Umwanditsi – SAFARI Garcon – inyarwanda.com