Makonikoshwa yashenguwe n’abantu baramutse bamubika ko yapfuye

Akimara gufata telefone Makonikoshwa wumvikanaga mu ijwi rifite rituje yahise agira ati “ Amakuru wangu? Nta kabuza impamvu umpamagaye ndayizi, gusa ndi muzima nta n’ibicurane ndwaye meze neza mpugiye mukurangiza amashusho y’indirimbo yanjye nshya.”

Uyu muhanzi yadutangarije ko byageze saa tatu n’igice amaze kwitaba telefone zirenga 20 zirimo abahamagara barira.

Ubusanzwe telefone yanjye nyiraza muri ‘silencieux’ ariko uyu munsi byari byandenzeho. Nka saa kumi n’ebyiri za mugitondo nibwo umuntu wa mbere yampamagaye, sinamwitabye kuko nari mfite ibitotsi, gusa nyuma yaho gato nahamagawe n’abantu benshi biba ngombwa ko mbyuka. Nkifata telefone nagiye kuma groupe ya WhatsApp mbamo mbona zimwe na zimwe barimo kumbika ko napfuye. Ni ibintu bisekeje cyane kuko rwose meze neza cyane. Mako aganira na INYARWANDA

Abatangaje inkuru yo kubika Mako bakanayihererekanya bagiraga bati “Mu masaha asatira nka saa 23:52 cyo kuri uyu wa kabiri nibwo havuzwe inkuru y’inshamugogo ko umuhanzi wakunzwe cyane mu Rwanda ndetse no hanze yarwo Makonikoshwa ko yitabye Imana akaba yaryamiye ukuboko kw’abagabo aho yari amaze iminsi arwariye mu bitaro bya CHK Reka twifatanye n’umuryango we dukomeze kuwihanganisha”.

Tumubajije aho abona iki gihuha cyaba cyari cyaturutse yavuze ko atabimenya neza, gusa ngo nta nubwo abyitayeho. Yagize ati “ Rekanze gato nyarukire ku muhanda ngure Internet ihagije nifotore ifoto yanjye nkoherereze urebe ko ntameze neza, ababihimbye bo barasekeje ariko simbyitayeho, gusa abakunzi banjye bamenye ko ndi muzima.”

Uyu mugabo abitswe nyuma y'imyaka isaga ibiri akirutse indwara yari yaramuhejeje mu gitanda, kuri ubu we akaba avuga ko ameze neza ndetse ashyize imbere ibikorwa ahugiyemo yizera ko bizamugarura neza ku ruhando rwa muzika.