Ibyari inzozi za benshi, kuri ubu byamaze kuba impamo, umuhanzi The Ben wari umaze imyaka ikabakaba 6 muri Leta Zunze Ubumwe za Amerika yageze i Kigali aho aje gutaramana n’abanyarwanda mu gitaramo ngarukamwaka cy’umwaka mushya cya‘East African Party’ gitegurwa na kompanyi ya East African Promoters.
The Ben wasesekaye ku kibuga cy’indege aherekejwe na David Bayingana bahuriye i Kampala, agikubita amaso abantu bari baje kumwakira yahise yunama yifata ku mavi araturika ararira ariko nyuma agerageza kwiyumanganya ubwo yageraga imbere y’itangazamakuru.
Colombe, umwe mu bakobwa beza wari watoranijwe na EAP guha indabo z'ikaze The Ben
Aha The Ben yageragezaga kwiyumanganya ageze imbere y'abantu, umuri inyuma ni David BAYINGANA wari wagiye kumusanganira i Kampala
The Ben yasesekaye ku kibuga cy'indege ahagana saa tanu n'iminota 50 z'amanywa
The Ben asuhuzanya na Mushyoma Joseph(Boubou), umuyobozi mukuru wa EAP(East African Promoters)
The Ben yatangarije itangazamakuru ko yishimiye cyane kugaruka mu Rwanda, aboneraho kwifuriza abanyarwanda bose umwaka mushya muhire na noheli nziza ndetse anabatumira mu gitaramo cye cyo ku itariki ya 01/01/2017 muri Parking ya Stade Amahoro. Ati " Ndabakunda cyane mwese, muzaze twishimane uriya munsi, ndizera ko bizaba ari byiza cyane, kandi mugire umwaka mushya muhire na Noheli nziza. Love you all"
Uyu muhanzi nyuma yo kuganira akanya gato n’abanyamakuru yahise ashyirwa mu modoka yari yateguriwe, gusa nyuma y’akanya gato mukuru we, Dany yaje kuhagera ari kumwe n’umubyeyi wabo(nyirakuru), maze amarangamutima yongera kurenga The Ben maze bose baraturika bararira ubwo bahoberanaga.
Babahaye rugari barahoberana bashira urukumbuzi, gusa amarira yabaye menshi bahunga ibyuma by'amanyamakuru byafataga amashusho maze binjira mu modoka barajyana aho The Ben yagiye kuruhukira
Nyirakuru yavugaga ko umwana w’Imana(Yesu) akoze ibitangaza akaba yongeye kubahuza n’umuhungu we nyuma y’imyaka 6 atamuca iryera. Yumvikanaga agira ati” Yoo mwana we ubuse koko ni wowe? Ubura amaso nkurebe neza. Umwana w’Imana akoze ibitangaza ndongeye ndakubonye mwana wa. Imana ishimwe.”
Andi mafoto...
The Ben nishimiye kongera guhura n'inshuti ye Dj Bob wamufashije cyane ubwo yatangiraga umuziki
David Bayingana wakoranye bya hafi na The Ben mu Inshuti z'ikirere, ni nawe uri kumufasha bya hafi muri uru rugendo rw'akazi ajemo mu Rwanda
Dany, mukuru wa The Ben na nyirakuru nabo bamusanganiye ku kibuga cy'indege, bakimubona byari ibyishimo bikomeye kuri bo
The Ben nawe yari yishimiye kongera kubona amaso ku maso abo mu muryango we
Utwana yasize ari uduhinja natwo twari twaje kumwakira, tumwereka urukundo rudasanzwe
Aba bafataga selfie
Ubwo nyirakuru yari avuye mu modoka aje kumusuhuza
Urukumbuzi rwari rwose
Dj Bob wari waje yambaye umupira uriho ifoto ya The Ben n'amagmbo yo kumuha akaze, aha yari kumwe na Jado MAX umunyamakuru wa Flash fm
Tubibutse ko ku mugoroba wo kuri uyu wa Gatandatu tariki ya 24 Ukuboza 2016, saa kumi n'igice z'umugoroba ari bwo The Ben hamwe n'ubuyobozi bwa East African Party bagirana ikiganiro n'itangazamakuru kiza gutangarizwamo byinshi ku gitaramo The Ben aje gukora cya East African Party, ikiganiro kiri bubere kuri Hotel Portofino ari naho The Ben yaruhukiye akigera i Kigali.
AMAFOTO: Selemani NIZEYIMANA
Eng
RSS 
TANGA IGITECYEREZO