Kuki Kabange Twite atabona umwanya muri AS Kigali?

Nshimiyimana Eric umutoza mukuru wa AS Kigali avuga ko uyu mugabo ukomoka muri Repubulika Iharanira Demokarasi ya Congo ataragera ku rwego rwiza rwatuma yifashishwa mu rugamba rwa shampiyona bigendanye n’ubukererwe bwagiye bubaho mu kugendana na bagenzi be mu myiteguro bagize.

Kabange Twite umwe mu bakinnyi bashya ba AS Kigali batarisanga neza mu bakinnyi bashaka amanota atatu

Buriya habaho impunduka bitewe n’ibyo dushaka n’ibyo twifuza, ariko urebye Kabange ikibazo nuko ikarita ye yari yatinze kandi urebye ukuntu turimo turakora ntabwo turamugeza kuri rwa rwego dushaka ko yahita yinjira muri groupe (mu itsinda ry’abakina) ariko tuzagenda tureba uko twagenda tumwinjizamo kugira ngo nawe afate abandi. Ni abakinnyi (bashya) bisaba ko dukora ntabwo wavuga ngo umusaruro urahita uwubona kuko ni process (uruhererekane). Eric Nshimiyimana

Ikipe ya AS Kigali ni imwe mu makipe yagiye ku isoko agura abakinnyi bari basanzwe muri iyi shampiyona harimo n’abari mu yandi makipe yazanye kugira ngo berekane urwego bariho babe bahabwa umwanya. Ibi ni ibintu byahitaga bigaragaza ko hazabamo guhatana (competition) hagati y’abakinnyi dore ko hari umwanya usanga ukinwaho n’abakinnyi barenze babiri.

Eric Nshimiyimana wakinnye muri APR FC n’Amavubi akomeza asobanura ko iyo mu ikipe yakoze impinduka nyinshi mu bakinnyi, bisaba umutoza gutuza akareka abakinnyi bagakora bikoresheje biturutse mu mitima yabo hanyuma urushije abandi kwigaragaza akaba ariwe uhabwa umwanya uhagije wo gukina.

Ati “Buriya mu ikipe iyo habayeho impinduka, nk’abakinnyi batatu mu ikipe (bashya), buriya umutoza agendera ku kubareka bakikorera we (umutoza) ikintu abakorera ni ukubayobora. Ariko iyo mufite uburyo style (uburyo bw’imikinire) yanyu hari igihe izo mpinduka n’ibyo byasabwa bibagora kugira ngo babimenyere. Ba Alexis (Nkomezi), Kodo (Nshutinamagara Ismael) na ba Kabange, harimo bamwe bakina biturutse ku myitozo tuba twakoze. Kodo arakina, Mubumbyi arakina, Michel Ndahinduka arakina usibye Alexis wakinnye umukino wa mbere.”

Nshimiyimana Eric umutoza mukuru wa AS Kigali

Nshimiyimana asoza avuga ko ikipe ye itazacika intege na rimwe ahubwo ko abakinnyi bagomba kumva ko bakuze igisigaye ari ugushaka intsinzi nta gukora amakosa yatuma batakaza imikino ibakura mu rugamba rw’igikombe cya shampiyona.

Kabange Twite yavuye muri APR FC nyuma yo kuhakina imyaka itanu (2007-2012) agana mu ikipe ya St Eloi Lupopo muri Repubulika Iharanira Demokarasi ya Congo ahamara imyaka igera kuri ine (2012-2016), abona kurambagizwa n’ikipe ifashwa byose n’umujyi wa Kigali.