Airtel Rwanda yatangiye ubufatanye mu bucuruzi n'Ijwi rya Bose mu rwego rwo gufasha abantu babana n'ubumuga

Ijwi rya Bose ni itsinda ry’itangazamakuru ryibanda ku kwamamaza uburenganzira bw’abafite ubumuga mu Rwanda. Airtel Rwanda n’Ijwi rya Bose bakaba bahuje imbaraga mu gufatanya kubona ibikoresho bizafasha abafite ubumuga gutangira ubucuruzi.

Icyitegetse na Denise mu gikorwa cyo gutanga ibikoresho

Iyi gahunda izafasha abagera kuri 40. Ijwi rya Bose bakaba batanze amafaranga ibihumbi 500 by’amanyarwanda naho Airtel yo ikaba yatanze ibikoresho by’ubucuruzi ndetse ikazanatanga ubufasha mu guhugura abo iyi gahunda igenewe iby’ibanze mu gukora ubucuruzi.

Umunyana mu muhango wo gutanga ibikoresho

Muri ibi bikoresho harimo, telefoni, amakarita yo guhamagara, simukadi(simcards) imitaka, imipira yo kwambara ndetse n’utumeza. Buri wese muri aba 40 akazahabwa telefoni, umupira wo kwambara, simukadi 10, akameza, umutaka wa Airtel ndetse n’amafaranga ibihumbi 30.

Bwna Romalis Niyomugabo, umuyobozi w’Inama Nkuru y’Abafite Ubumuga yagize ati “Ndashimira cyane ibigo bidufasha twe abanyarwanda. Iyi nkunga ya Airtel itugaragarije ko atari ikigo kigamije gukorera inyungu gusa ko ahubwo ari n’ikigo cyita  no ku iterambere n’imibereho myiza y’abanyarwanda. Iyi gahunda ndahamya ko izafasha abo yagenewe babashe kwiyubaka ndetse no kubaka ejo habo heza ndetse n’ah’igihugu.”

Umunyana aha ingofero ya Airtel umwe mu bagenewe iki kigorwa

Denise Umunyana, ufite itangazamakuru mu nshingano ze muri Airtel yagize ati “Ni inshingano zacu nka Airtel gufasha abanyarwanda binyuze muri gahunda zacu zitandukanye. Turi ikigo gihorana cyishimira cyane gufasha umuryango dukoreramo.  Twizera ko buri wese afite ubushobozi bwo kugira icyo akora. Niba hari icyo uzi gukora neza ni byiza kuko hari aho undi azagukenera.”

Umwe mu bagenerwabikorwa amaze guhabwa umutaka

Umuyobozi mukuru w’Ijwi rya Bose, JMV Icyitegetse yashimiye cyane Airtel yafatanyije nayo kugira ngo babashe kubaka imibereho myiza ku bantu bafite ubumuga.

Denise IRANZI