Nawe wabona urimo! 41% by’abakozi batangira icyumweru bananiwe kuruta uko batangira weekend

Akenshi umuntu ufite akazi abyuka yiganyira cyane cyane ku wa Mbere ndetse akajya ku kazi atizeye ko aratanga umusaruro nk’uko byagakwiye.

Kubera iki kibazo gihuriweho n’abantu batari bake, Zety yakusanyije amakuru y’abantu bahura n’iki kibazo isanga 41% batangirana umunaniro ukabije ku wa Mbere ndetse akaba ari nawo munsi banga wo gukoraho.

Ubushakashatsi bwa B2B Reviews bwanditswe na Forbes, bwerekanye ko abakozi baba bafite 25% by’imbaraga nke ku wa Mbere, ndetse hafi 50% bagira stress nyinshi kuri uwo munsi bituma umusaruro uba nkene.

Nyamara nubwo tuvuga ko umunsi wo ku wa mbere ari mubi, 70% by’abakozi bagira “Sunday Scaries”, ubwoba n’ihungabana bitewe no gutekereza ku Cyumweru gishya bagiye gutangira nk’uko hcamag.com ibitangaza.

Abashakashatsi bagaragaje ko iyo umuntu asinziriye amasaha abiri arenze ayo asanzwe asinzira mu mpera z’Icyumweru (weekend), bishobora guhungabanya isaha y’umubiri we kugeza ku minota 45, bikamutera umunaniro ku wa Mbere.

Mu bigo byinshi, abakozi baba bafite akazi kenshi buri wa Mbere mu gitondo bituma bahura n’ikibazo cya “Sunday Scaries” ndetse no kuri uwo munsi ntibatange umusaruro nk’uko babisabwa.

Kugira uturimo twinshi no gusangira n’inshuti akenshi biba mu mpera z’Icyumweru (weekend), bigira ingaruka mbi ku munsi wo ku wa Mbere aho umuntu abyuka ananiwe kuruta uko yagiye muri Weekend ananiwe.