UCL: Real Madrid yasezereye Atletico Madrid bigoranye, isanga Arsenal iyitegereje muri 1/4

Kuri uyu wa Gatatu ni bwo hasozwaga  imikino yo kwishyura ya 1/8 cya UEFA Champions League. Umukino wari uhanzwe amaso na benshi ni uwo Atletico Madrid yari yakiriyemo Real Madrid kuri Civitas Metropolitano saa Yine z'ijoro.

Uyu mukino watangijwe n'ikipe ya Atletico Madrid ikinisha imbaraga zidasanzwe ndetse ku munota wa 1 gusa ihita ifungura amazamu ku gitego cya Conor Gallagher ahawe umupira na Rodrigo De Paul.

Ikipe ya Atletico Madrid yakomeje gukinisha imbaraga gusa uko iminota yagendaga Real Madrid nayo itangira kugenda yinjira mu mukino gake gake ihererekanya neza umupira.

Ikipe ya Real Madrid yakomeje guhererekanya umupira neza ikagera imbere y'urubuga rw'amahina abarimo Vinicius Junior, Jude Bellingham na Rodrigo bagashaka aho bamenera ngo barekure amashoti ku munyezamu wa Atletico Madrid ariko bakahabura.

Mbere y'uko igice cya mbere kirangira Atletico Madrid yongeye kunyuzamo irasatira abarimo Julian Alvarez barekura amashoti ariko Courtois agatabara.

Mu gice cya kabiri Real Madrid yaje ikomeza guhererekanya umupira ndetse hari n'aho Rodrigo yahaye umupira mwiza Jude Bellingham ahagaze imbere y'izamu gusa Clement Lenglet awumukura ku kirenge.

Ku munota wa 69 Real Madrid yabonye penariti ku mupira mwiza Edouardo Camavinga yahaye Kylian Mbappé aragenda agera mu rubuga rw'amahina Clement Lenglet aramukurura.

Yahise iterwa na Vinicius Junior ariko ayitera hejuru y'izamu kure. Ku munota wa 90 ikipe ya Atletico Madrid yashoboraga kubona igitego cya kabiri ku mupira Marcos Llorent yahaye Angel Correrea ariko rinyura hejuru y'izamu gato.

Umukino warangiye Atletico Madrid itsinze 1-0 bituma hitabazwa iminota 30 y'inyongera bitewe n'uko umukino ubanza Real Madrid yari yawutsinze 2-1. Muri iyi minota 30 nabwo rwabuze gica hitabazwa penariti. 

Real Madrid yinjije penariti 4 naho Atletico Madrid yinjiza 2 ihita ikomeza muri 1/4 cya UEFA Champions League.

Indi mikino yakinwe Borussia Dortmund yatsinze Lille ibitego 2-1 ihita yerekeza muri 1/3 iyisezerera ku kinyuranyo cy'ibitego 3-1, Arsenal inganya na PSV Eindhoven ibitego 2-2 ihita iyisezerera ku kinyuranyo cy'ibitego 9-3 naho Aston Villa itsinda Club Brugge 3-0 ihita iyesezerera ku kinyuranyo cy'ibitego 6-1.

Muri 1/4 ikipe ya Real Madrid izacakirana na Arsenal, Paris Saint-Germain ihure na Aston Villa, FC Barcelona ihure na Borussia Dortmund naho FC Bayern Munich izahure na Inter Milan.

Real Madrid yasezereye Atletico Madrid 

Real Madrid izacakirana na Arsenal muri 1/4 cya UEFA Champions League