Umuntu umwe yishwe, abandi batanu barakomereka mu gitero cy'ubwiyahuzi mu Bufaransa

Ku wa Gatandatu tariki ya 22 Gashyantare 2025, mu mujyi wa Mulhouse uherereye mu burasirazuba bw'u Bufaransa, habereye igitero cy'ubwiyahuzi cyahitanye umuntu umwe, abandi batanu barakomereka. 

Umugabo w'imyaka 37 ukomoka muri Algeria, wari uzwi n'inzego z'umutekano kubera ibikorwa by'ubutagondwa, yafashwe akekwaho kuba ari we wagikoze. Bivugwa ko ubwo yakoraga icyo gitero, yaranguruye amagambo "Allahu Akbar" (Imana ni yo nkuru).

Icyo gitero cyabereye ku isoko riri mu mujyi wa Mulhouse, aho cyahitanye umusaza w'imyaka 69 ukomoka muri Portugal, wari ugerageje gutabara. Abapolisi batatu n'abashinzwe kugenzura aho imodoka ziparika babiri bari mu bakomerekeye muri icyo gitero. 

Umushinjacyaha wa Mulhouse yatangaje ko hatangijwe iperereza ku byaha by'iterabwoba kuko uwo mugabo yari asanzwe ari ku rutonde rw'abakekwaho ibikorwa by'ubutagondwa kandi yari yarategetswe gusubira iwabo.

Perezida Emmanuel Macron yemeje ko nta gushidikanya ko ari igitero cy'iterabwoba ry'Abayisilamu. Yihanganishije imiryango y'ababuze ababo, ati: "Ndashaka kongera gushimangira ubushake bwa guverinoma, n'ubwanjye, mu gukomeza akazi ko kurandura iterabwoba ku butaka bwacu."

BBC yatangaje ko Meya wa Mulhouse, Michèle Lutz, yanditse kuri Facebook ati: "Igitangaza cyafashe umujyi wacu." Minisitiri w'Ubutegetsi bw'Igihugu, Bruno Retailleau, ategerejwe kugera ahabereye icyo gitero ku mugoroba wo kuri uyu wa Gatandatu.

Umwanditsi: Kubwayo Jean de la Croix