Ahabanza Imikino

Haaland ni umutuku! Ibyo wamenya mbere y'uko Man City icakirana na Real Madrid muri Champions League

Yanditswe na: Aloys Niyonyungu
Taliki:11/02/2025 9:23 0

Rutahizamu w'ikipe ya Manchester City, Erling Haaland ntabwo afite imibare imuvugira mbere y'uko acakirana na Real Madrid mu mukino wa kamparamaka wa UEFA Champions League uzagena ikipe yerekeza muri 1/8.

Kuri uyu wa Kabiri tariki ya 10 Gashyantare 2025 ni bwo harakinwa imikino ibanza ya kamparamaka ya UEFA Champions League 2024/25.

Umukino utegerejwe na benshi ni uwo ikipe ya Manchester City iraba yakiriyemo Real Madrid kuri Etihad Stadium Saa yine z'ijoro. Iyi ni inshuro ya Kane yikurikiranya aya makipe yombi agiye guhura muri UEFA Champions League.

Mu mwaka ushize Real Madrid yari yasezereye Manchester City ubwo bari bahuriye muri 1/4 aho yayisezereye kuri penariti. Imibare yerekana ko mu myaka ine iheruka ikipe ya Real Madrid yaguye isezerera ikipe yo mu Bwongereza mu mikino yo gukuranwamo.

Muri UEFA Champions League ya 2020-21 yasezereye Liverpool, muri 2021-2022 isezerera Chelsea, Manchester City na Liverpool, muri 2022-23 isezerera Liverpool na Chelsea naho muri Champions League iheruka isezerera Manchester City.

Ubwugarizi bwa Manchester City budahagaze neza kuri ubu buraba buhura na Vinicius Junior umaze gutsinda ibitego 3 n'imipira ibiri yabivuyemo na Rodrigo umaze gutsinda ibitego bine ndetse n'umupira umwe wakivuyemo akina n'iyi kipe yo mu gihugu cy'u Bwongereza.

Ikipe ya Manchester City nayo ifite Kevin De Bruyne ukunze gushobora Real Madrid aho amaze kuyitsinda ibitego bine ndetse akaba yaranatanze imipira ine yabivuyemo mu mikino 8. Ibi bihita bimugira Umubiligi umaze kugira uruhare rw'ibitego byinshi kuri Real Madrid nyuma ya Giovane Élber.

Rutahizamu wa Manchester City, Erling Haaland we ntabwo arabasha gutsinda igitego mu mikino ine amaze guhura na Real Madrid ari muri iyi kipe. Mu minota 359 amaze gukina yagaeragejemo amashoti 13 gusa ntacyo yigeze abyara.

Ibi bigira Real Madrid ikipe akinnye nayo igihe kinini akaba atarayitsinda igitego gusa uyu munsi bishobora guhinduka.

Manchester City imaze gusezererwa na Real Madrid inshuro eshatu muri Champions League. Muri rusange imibare yerekana ko aya makipe yombi amaze guhura inshuro 12 muri iri rushanwa aho Real Madrid yatsinzemo imikino ine, akaba yaranganyije 5 naho Manchester City itsindamo 3.

Indi mikino iteganyijwe Brest irakira Paris Saint-Germain saa moya n'iminota 45 z'ijoro, Juventus yakire PSV Eindhoven naho Sporting CP yo yakire Borussia Dortmund Saa yine z'ijoro.