Yarashe umwana we w’umukobwa arapfa amuziza amashusho yashyiraga kuri TikTok

Anwar ul-Haq yashinjwe icyaha cyo kwica nyuma yo kwemera ko yarashe umukobwa we, Hira, mu mujyi wa Quetta, uherereye mu Majyepfo ashyira Uburengerazuba bwa Pakistan ku wa kabiri.

Ubwa mbere yari yabwiye abashinzwe iperereza ko ari abagabo batazwi bakoze ubu bwicanyi.

See w’umwana, ufite ubwenegihugu bwa Amerika, yavuze ko yabonaga ibyo umukobwa we yashyiraga ku mbuga nkoranyambaga  bidasanzwe kandi bidakwiriye.

Polisi yatangaje ko iri gusuzuma impamvu zose zishobora kuba zaratumye Hira yicwa, harimo no kuba ari icyaha cyo kwica.

Nk’uko amakuru y’imiryango iharanira uburenganzira bwa muntu abivuga, buri mwaka abantu amagana menshi muri bo bakaba abagore bicwa muri Pakistan mu byaha bifitanye isano no gushaka ishema ry’umuryango cyane cyane mu gihe hari abantu bakoze ibintu bitari byiza. Abakora ibyo byaha bavuga ko baba barengera icyubahiro cy’imiryango yabo.

Ku bijyanye n’urupfu rwa Hira Anwar, wari ufite hagati y’imyaka 13 -14, umuvugizi wa polisi yatangaje ko umuryango we "wajyaga unenga imyambarire ye, uburyo yabagaho ndetse n’imibanire ye n’abandi."

Uyu muryango wari umaze imyaka 25 uba muri Leta Zunze Ubumwe za Amerika, kandi Hira yatangiye gushyira ibi bintu kuri TikTok mbere y’uko  wimukira muri Pakistan.

 Abashinzwe iperereza batangaje ko bafite telefone ya Hira ariko kugeza ubu ikaba ifunze.

Polisi ivuga kandi ko muramu wa se wa Hira na we yatawe muri yombi mu bijyanye n’iki cyaha.

Niba bigaragaye ko iki cyaha ari icyo "kurengera icyubahiro" kandi abagize uruhare bagahamwa n’icyaha, bazahanishwa gufungwa burundu nk’uko biteganywa n’ivugurura ry’amategeko ryakozwe na leta ya Pakistan mu mwaka wa 2016. Mbere yaho, bari bashobora kwirinda igihano cyo gufungwa mu gihe bababarirwaga n’umuryango w’uwishwe.

Mu mwaka wa 2023, urukiko rwo mu Butaliyani rwahanishije ababyeyi b’umunya-Pakistan gufungwa burundu kubera kwica umukobwa wabo w’imyaka 18 wari waranze gushyingirwa ku gahato.

Umwaka wabanje, musaza wa Qandeel Baloch, icyamamare ku mbuga nkoranyambaga muri Pakistan, yarekuwe ku byaha byo kumwica nyuma yo kujurira ubwo yari amaze guhamwa n’icyaha mu 2016, yari yemeye ko yishe mushiki we avuga ko byatewe nuko yateje umuryango igisebo.

SRC: BBC