Lewis Hamilton yakoreye imyitozo ya mbere muri Ferrari ku kibuga cya Fiorano

Uyu mugabo w’imyaka 40 ufite ibikombe birindwi bya shampiyona ya F1, yatangiye kwimenyereza imodoka ya Ferrari yakozwe mu mwaka wa 2023.

Hamilton yitabiriye iyi myitozo nyuma yo kumara iminsi ibiri mu ruganda rwa Ferrari i Maranello, aho yakoranaga n’ikipe ye nshya mu rwego rwo kumenyekana no kumvikanisha imikorere mishya.

Lewis Hamilton, wamenyereye mu gukoresha moteri za Mercedes mu myaka 18 y’akazi ke muri Formula 1, akigera muri Ferrari yahereye ku gusobanukirwa uburyo moteri za Ferrari zikorera hamwe n’ikoranabuhanga rishya rizamufasha mu mwaka w’imikino. 

Imashini za Formula 1 z’iki gihe, zizwi nka 1.6-litre V6 turbo hybrid, zifite uburyo bukomeye bwo gukusanya ingufu no kuyoborwa hifashishijwe porogaramu za mudasobwa, bisaba igihe ngo umushoferi azimenyere neza.

Iyi myitozo y’imodoka  za Ferrari izafasha Hamilton gutangira kugirana ubushuti n’ikipe no kumenyerana na bagenzi be, harimo umunjeniyeri we mushya, Riccardo Adami. Uyu ni umunjeniyeri wabaye ikirangirire mu gutwara abashoferi nka Carlos Sainz na Sebastian Vettel, ufite ibikombe bine bya shampiyona.

Imyitozo ya Lewis Hamiliton yari yitabiriwe n’amatsinda y’abafana b’ikipe ya Ferrari bari bateraniye ku kiraro gihana inkengero z’ikibuga cya Fiorano, bategereje kubona isura ya Hamilton mu modoka y’ikipe yabo nshya. Gusa, ubukonje bwa Mutarama mu gace ka Emilia-Romagna bwabaye imbogamizi, ariko ntabwo bwabujije ibikorwa gukomeza.

Hamilton azongera gukora imyitozo ku kibuga cya Circuit de Barcelona-Catalunya muri Espagne mu byumweru biri imbere. Azahura bwa mbere n’imodoka nshya ya Ferrari yo mu 2025 mu birori bizaba ku wa 19 Gashyantare. Ku wa 18 Gashyantare, azitabira ku mugaragaro igikorwa cyo gutangiza umwaka wa Formula 1, kizabera i Londres mu Bwongereza.

Lewis Hamiliton yakoze imyitozo ya mbere muri Ferrari

Hamiliton yakoranye imyitozo imodoka ya Ferrari 2023