Ari mu banyempano bato batanga icyizere! Amashimwe Akaliza w'imyaka 10 yinjiranye mu 2025 - VIDEO

Akaliza Shimwa Gaella, umwana muto ukora umuziki wo kuramya no guhimbaza Imana, wamamaye cyane ubwo yasubiragamo indirimbo z’abandi bahanzi, yamaze gushyira hanze indirimbo ye nshya yise ‘Akira Amashimwe,' ikaba ifite umwihariko wo kuba iri mu ndimi eshatu.

Ni indirimbo yasohokanye n'amashusho yayo, yagiye ahagaragara kuri uyu wa Gatandatu tariki 18 Mutarama 2025. Inyikirizo yayo iri mu ndimi eshatu; Ikinyarwanda, Igiswahili n'Icyongereza, ariko aho aririmba mu Kinyarwanda aragira ati: "Uwiteka yadukoreye ibikomeje natwe turishimye."

Muri iyi ndirimbo, Akaliza azamura amashimwe y'abo Imana yahaye agakiza, abo yahaye urubyaro, abo yakijije indwara, abo yahaye kwiga bagatsinda, abo yarinze bakabasha gusoza umwaka wa 2024, n'abo Imana yarinze guseba mu maso y'ababahigaga.

Hari n'aho agira ati: "Twese abo wagiriye neza tuguhaye amashimwe n'icyubahiro. Mana uri nziza ugira neza, akira amashimwe y'abana bawe."

Shimwa Akaliza n’ubwo ari muto mu myaka ariko ni munini cyane mu muziki, dore ko ari na we wateye indirimbo yakunzwe bikomeye yitwa "Shimwa" ya Injili Bora imwe mu makorali akunzwe muri Kigali. Uretse kuririmba, ni n'umuhanga cyane mu kubwiriza. 

Uyu mwana ukiri muto mu myaka akagira impano idasanzwe, yamenyekanye asubiramo indirimbo z’abandi bahanzi mbere y’uko atangira gukora umuziki we.

Inyinshi mu ndirimbo yakoze ni iz'abandi yabaga yasubiyemo (Cover). Indirimbo zose yakoze ziri kuri shene ye ya Youtube yitwa Shimwa Akaliza Gäella, hakaba hariho n'ijambo ry'Imana abwiriza kuko asanzwe ari n'umuvugabutumwa bwiza bwa Yesu. Hejuru y'ibyo, Akaliza ni n'umuririmbyi muri korali yitwa Injili Bora ikorera umurimo muri EPR. Gikondo/Karugira.

Shimwa Akaliza Gaella avuka mu muryango w'abana 3 akaba ari we mfura. Ni umukobwa, abandi bavandimwe be babiri ni abahungu. Yatangiye kuririmba afite imyaka 3 y'amavuko, atangira kuririmba muri Injili Bora ajyana na nyina. Yashyize hanze indirimbo ye ya mbere afite imyaka 6.

Ababyeyi ba Akaliza Gaella bamwifuriza "kuzaba umuririmbyi ukomeye wubaha Imana kandi uca bugufi". Arakataje mu muziki aho akomeje gushyira hanze indirimbo zikora ku mitima ya benshi.

Akaliza Gaella uri mu baramyi bato batanga icyizere cy'umuziki wa Gospel w'ejo hazaza, yatangiranye umwaka amashimwe akomeye

Yashyize hanze indirimbo ye nshya ikubiyemo amashimwe anyuranye ashimangira urukundo rw'Imana ku bantu bayo

Ni umwe mu baramyi bato batanga icyizere cy'ejo hazaza h'umuziki wo kuramya no guhimbaza Imana

Aritegura kuzuza imyaka 11 y'amavuko

">Kanda hano urebe indirimbo nshya Akaliza Shimwa Gaella yise 'Akira Amashimwe'

">