Ole Gunnar Solskjaer yongeye kubona akazi nyuma yo kwirukanwa na Man United

Izi ni inshingano za mbere Solskjaer asubiyeho nk'umutoza kuva yirukanwe na Manchester United mu 2021. Besiktas, ikipe imaze kwegukana igikombe cya Turkish Super Lig inshuro 16, iri ku mwanya wa gatandatu muri shampiyona uyu mwaka. 

Kuva umutoza Giovanni van Bronckhorst yasezera ku mirimo ye mu Ugushyingo, Besiktas yari itarabona umutoza mukuru w’igihe kirekire.

Mu itangazo Besiktas yasohoye, yagize iti: “Twizera ko Ole Gunnar Solskjaer azagira uruhare rukomeye mu iterambere ry’ikipe yacu, kandi turamwakiriye mu muryango wa Besiktas tumwifuriza amahirwe masa.”

Solskjaer afite inshingano zikomeye zo kugarura ikipe ku murongo, cyane ko Besiktas ikomeje guhatanira imyanya myiza muri shampiyona. Kuri ubu, iyi kipe irateganya guhura na Samsunspor kuri uyu wa Gatandatu, ikazakurikiraho gusura Antalyaspor mu cyumweru gitaha.

Beskitas niyo kipe yongeye kugirira ikizere Ole Gunnar nyuma y'uko yirukanwe na Man United muri 2021 ubwo yasimbuwe na Rarph Rangnick.

Mu mikino ya Europa League, Besiktas iri ku mwanya wa 28, ibura inota rimwe ngo igere mu mikino ya playoffs, kandi hasigaye imikino ibiri yo kurangiza icyiciro cy’amatsinda.

Kugira ngo Solskjaer agire intangiriro nziza muri iyi kipe, azakenera gukoresha ubunararibonye bwe nk’umutoza n’umukinnyi wahize abandi. Abakunzi ba Besiktas bafite icyizere ko uyu mutoza azahindura byinshi, cyane ko afite umuco wo gutsinda no guharanira intsinzi.

Ole Gunnar yongeye kubona akazi nyuma yo kwirukanwa na Man United