2024 wari umwaka urimo akazi kenshi ariko watanze umusaruro – Perezida Kagame

Kuri uyu wa Kane tariki 16 Mutarama 2025, Perezida Paul Kagame na Madamu Jeannette Kagame bakiriye ku meza abadipolomate bakorera mu Rwanda.

Perezida Kagame yavuze ko umwaka wa 2024 wari ufite ibisobanuro byinshi ku Banyarwanda kuko bawizihijemo imyaka 30 ishize Jenoside yakorewe Abatutsi ihagaritswe n’uko Igihugu cyabohowe ndetse n’amatora.

Ati: "Umwaka wa 2024 wari usobanuye byinshi ku Banyarwanda, twizihije isabukuru ebyiri, harimo iyo 'Kwibuka30' n'iyo 'Kwibohora30' yakurikiwe n'amatora y'Igihugu. Mu by'ukuri wari umwaka urimo akazi kenshi kuri twebwe ariko watanze umusaruro."

Ibi, Umukuru w’Igihugu yanabigarutseho ubwo yinjizaga Abanyarwanda mu mwaka mushya wa 2025, yavuze ko mu 2024, u Rwanda rwibutse ku nshuro ya 30 imyaka ishize Jenoside yakorewe Abatutsi ibaye, inangana n’ishize igihugu cyibohoye. Yavuze ko ibyo byombi bigaragaza urugendo igihugu kimaze gutera.

Ati: “Twizihije kandi kwibohora kw’igihugu cyacu, ibyo byombi bitwibutsa aho twavuye n’aho tugeze biturutse ku ntego duhuriyeho twese yo gutera imbere no kwiyubaka.”

Yagarutse ku bindi byabaye mu 2024 harimo nk’amatora, avuga ko yagenze neza kandi bishimangira icyizere abaturage bafitiye abayobozi babo.

Ati “Amatora aheruka yagenze neza, ndongera gushimangira icyizere Abanyarwanda bafitiye abayobozi babo n’inzego z’igihugu. Nongeye gushimira Abanyarwanda bose n’inshuti z’u Rwanda inkunga yanyu mu gihe cy’amatora ndetse no mu bindi bihe, igihe cyose iyo nkunga iba ikenewe,”

Abanyarwanda bagaragaje mu ijwi riranguruye ko bashaka kugera no ku bindi byinshi kandi byiza, na serivisi zirushijeho kuba nziza mu myaka iri imbere kandi tugomba gufatanya kugira ngo tubigereho.”

Umukuru w’Igihugu yashimye ababaye hafi y’u Rwanda mu myaka 30 ishize, ashimangira ko rubabona nk’abafatanyabikorwa barwo mu rugendo rwo kwiyubaka.

Ati: “Ni yo mpamvu umwanya nk’uyu ari ingenzi cyane aho tuganira, tugakomeza kubashimira mwese.’’

Perezida Kagame yabwiye abadipolomate n’abahagarariye imiryango mpuzamahanga ikorera mu Rwanda ko umubano warwo n’amahanga ugenda waguka. 

Ati: “Ibi byerekana icyerekezo n’intego y’u Rwanda yo gufungurira Isi amarembo yo kwimakaza imikoranire, guhanga ibishya no kwaguka guhuriweho.’’ 

Perezida Kagame yakiriye ku meza abadipolomate n'abahagarariye imiryango mpuzamahanga ikorera mu Rwanda