Urubyiruko rwongeye gusabwa gukaza ubwirinzi bwa SIDA kuko amazi atakiri ya yandi

Ni ibikubiye mu butumwa Minisiteri y’Urubyiruko n’Iterambere ry’Ubuhanzi yageneye urubyiruko, irusaba gushyira imbaraga mu kwirinda Virusi Itera SIDA, kuko ubwandu bwayo bukomeje kwiyongera mu rubyiruko. 

Minisitiri w’Urubyiruko n’Iterambere ry’Ubuhanzi, Dr Utumatwishima J. Nepo Abdallah ubwo yatangizaga gahunda y'Isangano ry'Urubyiruko ku nshuro ya 3, yasabye urubyiruko gukomera ku ngamba zo kwirinda virusi itera SIDA.

Ati: "Nagira ngo mbabwire ko kino kibazo cy'ubwiyongere bwa SIDA mu bato, kiraduhangayikishije. Ushobora kwirinda kunywa inzoga nyinshi, ariko nabwo ukishora mu busambanyi, byose ntaho wazageza u Rwanda, ntaho wazigeza wowe, nta n'aho wazageza umuryango wawe. Ndagira ngo icyo nacyo mugisubireho, mukitondere."

Yakomeje yereka urubyiruko icyerekezo cy’u Rwanda mu myaka itanu iri imbere, ko Igihugu kiyemeje kongera imbaraga mu guhanga imirimo, abashishikariza kwitabira amahirwe yose bashyirirwaho na Leta.

Si ibyo gusa kandi, kuko Minisitiri Utumatwishima yaboneyeho kwibutsa urubyiruko ko ntacyo bageraho badafite kwiyubaha no kugira ikinyabupfura. Ati: “Ndasaba ko icyo uzashyiraho umutima ngo ugikore, ujye ugikorana ubushake n’ubushobozi nk’ubw’Inkotanyi.

Ibi bitangajwe mu gihe imibare iherutse gutangazwa n’Ikigo cy’Igihugu cy’Ibarurishamibare igaragaza ko muri 2023 abarenga 9,000 basanzwemo Virusi itera SIDA.

Muri iyi raporo, mu bantu basaga ibihumbi 380 bari hagati y’imyaka 15 na 24 bapimwe, abarenga 1600 muri bo banduye Virusi Itera SIDA. 

Mu kwezi k’Ukuboza 2024, Ministeri y’Ubuzima yatangaje ko mu bantu 100 bapfa ku munsi mu Rwanda, barindwi muri bo baba bishwe na SIDA naho abantu icyenda mu Rwanda bakandura SIDA ku munsi. 

Imibare y’Ikigo cy’Igihugu cy’Ibarurishamibare, igaragaza ko mu Banyarwanda basaga ibihumbi 9 banduye Virusi itera SIDA muri 2023 aho mu cyiciro cy’urubyiruko ruri hagati y’imyaka 15 na 24 ho bugenda bwiyongera kuko buri ku kigereranyo cya 35%.

Ni mu gihe imibare y’Ikigo cy’Igihugu cy’Ubuzima, RBC, igaragaza ko mu Rwanda hose, abafata imiti igabanya ubukana bwa Virusi itera SIDA barenga ibihumbi 220, naho 95% bafata imiti neza, mu gihe 90% bagaragaza impinduka nziza z’igabanyuka ry’ubukana bwa Virusi itera SIDA.

Icyakora SIDA iri mu bitwara ubuzima bw’abantu kuko mu Ukuboza 2024 Minisitiri w’Ubuzima, Dr Sabin Nsanzimana yatangaje ko nibura mu bantu 100 bapfa ku munsi mu Rwanda, barindwi baba bishwe na SIDA, ahanini bitewe no kutamenya ko bayanduye cyangwa gutinya ko bigaragarira abantu bose.