Ahabanza Imyidagaduro

Juno Kizigenza, Social Mula, Bosco Nshuti na Alto mu bagufasha kuryoherwa na Weekend-VIDEO

Yanditswe na: Brenda MIZERO
Taliki:11/01/2025 9:16 0

Nk’uko bisanzwe bigenda mu mpera za buri Cyumweru, InyaRwanda ibagezaho urutonde rw’indirimbo nshya z’abahanzi barimo abamaze kugera ku rwego rukomeye n’abakizamuka.

Ikigamijwe ni ugutanga umusanzu mu iterambere ry’umuziki no gufasha abadukurikira kuruhuka no kunogerwa n’impera z’icyumweru. Kuri iyi nshuro abahanzi batandukanye bakoze mu nganzo batanga ibihangano bishya.

Kuri ubu, abahanzi nyarwanda baba abakora umuziki usanzwe ndetse n’abakora uwo kuramya no guhimbaza Imana bose bakoze mu nganzo.

Mu bahanzi bakoze mu nganzo, harimo na Social Mula watangiye gushyira hanze indirimbo zigize album ye ya kabiri yise “Confidence’’.

Uyu muhanzi yashyize hanze indirimbo yise “Amola” yahuriyemo n’uwitwa Lil Chance uri mu bahanzi bari kuzamuka. Uyu muhanzi yavuze ko iyi ndirimbo mu rwego rwo gukomeza gusogongeza abakunzi be album ye nshya.

Iyi ndirimbo iri muri Afro Zouk, yakozwe mu buryo bw’amajwi na Bertzbeats, mu gihe amajwi yakozwe na YC.

Social Mula yabwiye Itangazamakuru ko umuntu yumvise iyi ndirimbo atahita yumva neza album ye ariko uko azagenda ashyira hanze indirimbo abantu bazagenda banyurwa kandi bakumva neza indirimbo ze nshya.

Ati: “Iyi ndirimbo ntabwo yahita yerekana neza ishusho ya album, ariko abantu uko bazagenda bumva ibihangano byanjye biyigize bazagenda bayisobanukirwa.”

Yavuze ko kuri ubu ari gutegura guhita ashyira hanze indi ndirimbo mu minsi ya vuba, gusa ntiyavuga igihe neza ahubwo agaragaza ko bizaterwa n’uko abantu bazakira iyi yashyize hanze. Iyi album nshya ya Social Mula iriho indirimbo 12.

Uretse urukundo hariho n’indirimbo imwe yo kuramya Imana, yashyizeho mu rwego rwo kuyishimira mu byo yagiye anyuramo ariko ikamuba hafi.

Social Mula aheruka kuvuga ko yayitabajeho abatunganya indirimbo batandukanye mu Rwanda barimo Knox Beat, YewëeH, Pakkage, Iyzo Pro na Bertzbeats mushya ari nawe wakoze “Amola” yashyize hanze.

Iyi album kandi yakozweho na Producer BassBoy ugezweho muri Uganda wakozeho imishinga y’indirimbo enye. Izi zirimo iyo yakoranye na Dokta Brain,Feffe Bussi ndetse n’undi muhanzikazi witwa Wase; ndetse n’iye yahakoreye.

Social Mula avuga ko impamvu yise iyi album ‘Confidence’ ari uko kwigirira icyizere ari cyo kintu cya mbere gifasha umuntu, ariko na none akaba afite indirimbo yitwa gutya.

Ati: “Impamvu nayise 'Confidence' buri muntu wese akwiriye kwigirira icyizere, kugira ngo wumve ko ibintu uri gukora uri kubihamya, ubishoboye kandi n’abantu bigomba kubanogera. Ikindi kuri ‘Album’ hariho n’indirimbo nise ‘Confidence’.

Ni indirimbo y’urukundo, ariko kuba album narayise iri zina hari impamvu nahereyeho, ariko kwigirira icyizere mu kazi kanjye nicyo kintu kingize.”

Yavuze ko yari afite amazina menshi yagombaga kwita iyi album ariko ‘Confidence’ rikamuzamo kenshi, ndetse yanagisha inama abantu bayikoranye bakamubwira ari izina ryiza.

Tariki 23 Ugushyingo 2019 yamuritse album ye ya mbere yise ‘Ma Vie’, bivuze ko iyi album agiye gushyira hanze muri uyu mwaka izaba ari iya kabiri mu rugendo rwe rwa muzika.

Dore indirimbo 10 nshya InyaRwanda yaguteguriye zakwinjiza neza mu mpera z’icyumweru cya kabiri cy’umwaka wa 2025:

1. Amola – Social Mula ft Lil Chance