Rutsiro FC yihanije Gorilla FC mu mukino ukomeye

Igice cya mbere cyaranzwe no kwataka ku mpande zombi, aho Rutsiro FC yagaragaje ubukaka mu busatirizi bwayo buyobowe na Habimana Yves, Mumbele Jonas Malikidogo, na Mumbele Mbusa. Nubwo bateye amashoti menshi, ubwugarizi bwa Gorilla FC bwari bwitwaye neza, cyane cyane abakinnyi nka Nsengiyumva Samuel, Rutanga Eric, n’umuzamu Ntagisanayo Serge.

Ku rundi ruhande, Gorilla nayo yakiniraga imbere y’abafana bayo, yagaragaje imbaraga mu busatirizi buyobowe na Irakoze Darcy, Karenzo Alex na Ntwali Evode, ariko ba myugariro ba Rutsiro barimo Kwizera Bahati, Mutijima Gilbert n’umuzamu Matumele Arnold bahagarara neza. Igice cya mbere cyarangiye amakipe yombi anganya 0-0.

Mu gice cya kabiri, Gorilla FC yafunguye amazamu ku munota wa 50, ku gitego cyatsinzwe na Karenzo Alex, nyuma yo gucenga ba myugariro ba Rutsiro FC.

Ku munota wa 57, Gorilla yahuye n’akaga  Uwimana Kevin ahabwa ikarita itukura, nyuma yo gukorera ikosa rikomeye kuri Mumbere Jonas wari uri hafi kugera mu rubuga rw’amahina. Nubwo Rutsiro yahawe kufura muri ako kanya, ntacyo yatanze.

Rutsiro FC yakomeje kotsa igitutu Gorilla FC, byatanze umusaruro ku munota wa 83, ubwo Nsabimana Jean Claude yatsindaga igitego cya mbere, nyuma y’akavuyo kabereye imbere y’izamu rya Gorilla.

Habimana Yves, wahize abandi mu busatirizi bwa Rutsiro, yongeye gushimangira intsinzi ku munota wa 90, atsinda igitego cya kabiri cyabonetse nyuma yo gucenga abakinnyi ba Gorilla. Umukino warangiye Rutsiro FC itsinze Gorilla FC ibitego 2-1.

Gutsinda uyu mukino byatumye Rutsiro FC izamuka ku mwanya wa gatandatu ku rutonde rwa shampiyona n’amanota 21, mu gihe Gorilla FC yagumye ku mwanya wa kane n’amanota 23.

I Ngoma, Kiyovu Sports yanganyije na Muhazi United 0-0, bituma ijya ku mwanya wa 14 n’amanota 12, igenda iva mu bihe bitoroshye byo guhatanira kutamanuka mu cyiciro cya kabiri.

Abakinnyi babanje mu kibuga ku ruhande rwa Gorilla FC

Abakinnyi babanje mu kibuga ku ruhande rwa Rutsiro FC

Rutsiro yatsindiye Gorilla i Kigali