"Kera nkiri muto ntarizera Yesu wabambwe nari mu mwijima sinari nzi Imana Rurema. Maze kwizera Yesu, byose byahindutse kuba bishya, yanyambitse umwambaro wo kwera ampa n'ubugingo. Yampinduriye ubuzima, yampinduriye amateka, yangize umwana w'Imana ihoraho". Ni amwe mu magambo agize indirimbo "Yampinduriye ubuzima" ya Shalom choir.
"Yampinduriye ubuzima" ni ndirimbo yakoze ku ndiba y'umutima y'abakunzi b'umuziki wo kuramya no guhimbaza Imana nk'uko bigaragara mu butumwa bamwe banyujije kuri Youtube munsi y'iyi ndirimbo. Jonathan Nsengiyumva ati "Mbega umurimo Yesu yakoze ukuntu ari mwiza, ni wo wankuye mu mwijima unzana mu mucyo".
Serge Ngoga yagize ati "Yesu yarakoze yaduhinduriye ubuzima yatugize abana b'ihoraho". Uwineza Martine ati "Umva nyikunda kubi 'Yampinduriye ubuzima', yangize umwana w'Imana ku bw'amaraso ya Yesu. Muhabwe umugisha Shalom choir." Nyirasafari ati "Uwiteka ahimbazwe ku bwanyu, imbaraga, amavuta no kwaguka ni byo tubifurije".
Korali Shalom yashinzwe mu 1986, itangira ari korali y’abana bato. Icyo gihe muri ADEPR Nyarugenge hari korali nkuru imwe ariyo Hoziyana. Mu 1986, abari bayigize bari bafite imyaka iri hagati ya 15-17 y'amavuko. Yaje kuba korali y’urubyiruko, icyo gihe mu Gakinjiro haza indi korali yitwaga korali Cyahafi kuri ubu yitwa Baraka ari nayo yahise iba iya kabiri.
Mu 1990, ni bwo Shalom choir yaje kwemererwa n'itorero ryabo kwitwa izina dore ko yari imaze igihe kirekire ari iy'abana yitwa Korali Umunezero hanyuma bahita bitwa Shalom choir.
Yahise izamukana imbaduko mu murimo w'Imana aho yakoze album mbere ya Jenoside yakorewe Abatutsi ariko ntibayisohora ku bwo kumva iri ku rwego rwo hasi, ariko biyifasha mu rwego rwo kongera ubumenyi no kwiyongerera umuhate dore ko abagiye inama, Imana ibasanga.
Mu gihe cya Jenoside yakorewe Abatutsi muri Mata 1994 yahitanye inzirakarengane zirenga Miliyoni mu minsi ijana, Shalom Choir nayo yagizweho ingaruka nyinshi nk'uko mu gihugu hose nta kanyamuneza kaharangwaga n'ibyishimo.
Shalom Choir yakomeje kwiyubaka kugira ngo agahinda katabatwara bakibagirwa gukorera Imana kandi ariyo igena byose imenya ikiri imbere umuntu atazi. Nyuma yo guca muri ibyo bihe bitoroshye, bongeye gukora Album ariko nanone ntibayigurisha kuko bumvaga iri ku rwego rwo hasi bitewe n'umwimerere bashakaga muri album yabo.
Nyamara n'ubwo batakoze album, Shalom Choir bakoze indirimbo nyinshi zo kuvuga no kwamamaza imirimo y'Imana akaba ari nawo mwihariko wabo, muri zo harimo indirimbo nka; 'Nzirata Umusaraba', 'Nyabihanga', 'Abami n'Abategetsi', ‘Uravuga bikaba, ‘Umuntu w’imbere’, ‘Mfite Ibyiringiro’, ‘Ijambo Rirarema’, ‘Icyizere’, ‘Nduhiwe’ n’izindi.
Shalom choir izwiho gukora ibikorwa biremereye bikunze kugora benshi, bakabikora ku bw'icyubahiro cy'Imana. Bakoreye igitaramo muri Kigali Convention Center ndetse bongera gukora ikindi muri BK Arena aho iyi nyubako yuzuye ndetse abarenga 100 bakiriye agakiza. Ni igitaramo cyabaye ku wa 17 Nzeri 2023, bakaba barasangiye uruhimbi na Israel Mbonyi.
Bitari ukuririmbira abantu gusa, Shalom Choir ijya ikora ibikorwa by'urukundo bagafasha abatishoboye bitari ukubahumuriza no kubabwira ijambo ry'Imana gusa. Yahuye n'ibigusha, ibisitaza n'ibigeragezo byinshi mu murimo wo gukorera Imana ariko kubera umuhamagaro n'umuhate wo gukorera Imana babashije kubicamo amahoro.
REBA INDIRIMBO NSHYA "WAMPINDURIYE UBUZIMA" YA SHALOM CHOIR
Shalom Choir bashyize hanze indirimbo nshya y'amashusho bise "Wampinduriye ubuzima"