Ikipe ya Arsenal yahaye ikaze umutoza mushya wa Manchester United, Roben Amorim imutsinda ibitego 2-0 naho Liverpool iratokorwa inganya na Newcastle United ibitego 3-3 mu mikino yo ku munsi wa 14 wa shampiyona y'icyiciro cya mbere mu gihugu cy'u Bwongereza.
Iyi mikino yakinwe kuri uyu wa Gatatu taliki ya 5 Ukuboza 2024. Saa yine n'iminota 15. Saa yine n'iminota 15 kuri Emirates Stadium Arsenal yari yakiriye Manchester United.
Uyu mukino watangiye amakipe yombi yigana ariko Arsenal ikanyuzamo akaba ariyo irema uburyo bwinshi imbere y'izamu.
Ikipe y'abarashi niyo yakomeje gusatira cyane binyuze ku mupira y'imiterekano yabonaga ariko ba myugariro ba Manchester United bagakomeza kwihagararaho.
Manchester United wabonaga yaje mu mukino ifite gahunda yo kugarira cyane kurusha gusatira dore ko abakinnyi bayo bakinaga imbere nabo babaga bagarutse inyuma gutanga umusanzu.
Abakinnyi nka Bukayo Saka na Gabriel Martinelli bagerageje gushaka igitego gusa biranga igice cya mbere kirangira ari 0-0.
Mu gice cya kabiri umutoza wa Manchester United, Roben Amorim yaje akora impinduka mu kibuga havamo Tyrell Malacia hajyamo Amad Diallo.
Arsenal yakomeje gusatira ishaka uko yafungura amazamu maze ku munota wa 54 Jurrien Timber aza kubikora ku mupira wari uvuye muri koroneri yatewe na Declan Rice.
Manchester United yongeye gukora impinduka mu kibuga havamo Mason Mount, Alejandro Garnacho na Harry Maguire hajyamo Marcus Rashford, Joshua Zirkzee na Leny Yoro.
Ku munota wa 65 ikipe y'amashitani atukura yabonye kufura nziza ku ikosa ryari rikorewe Amad Diallo, iterwa na Bruno Fernandes maze Matthijs de Light ashyiraho umutwe gusa David Raya aratabara.
Ku munota wa 73 Arsenal yabonye igitego cya kabiri gitsinzwe na William Saliba akoresheje umutwe ku mupira wari uvuye muri koroneri.
Mu minota ya nyuma y'umukino Arsenal yakomeje kwatsa umuriro imbere y'izamu rya Manchester United ariko umukino urangira itsinze ibitego 2-0.
Indi mikino yakinwe Liverpool yanganyije na Newcastle United ibitego 3-3. Ibitego bya Liverpool byatsinzwe na Curtis Jones ku munota wa 50 na Mohamed Salah kuwa 68 na 83 mu gihe ibya Newcastle United byo byatsinzwe na Alexander Isak ku munota wa 35, Anthony Gordon ku munota wa 62 ndetse na Fabian Schar ku munota wa 90.
Manchester City yatsinze Nottingham Forest ibitego 3-0, Chelsea inyagira Southampton ibitego 5-1, Everton itsinda Wolves ibitego 4-1 naho Aston Villa itsinda Brentford ibitego 3-1.
Kugeza ubu Liverpool iracyayoboye n'amanota 35, Chelsea ikaba iya kabiri n'amanota 28 inganya na Arsenal ya 3 mu gihe Manchester City yo iri ku mwanya wa 4 n'amanota 26.
Arsenal yanyabitse Man United ibitego 2-0
Eng
RSS 
TANGA IGITECYEREZO