Byinshi ku mukirigitananga Siboyintore utegerejwe mu gitaramo 'Unveil Africa Fest'

'Unveil Africa Fest' izabera muri Camp Kigali, tariki 07 Ukuboza 2024, yitezweho kuzatanga ibyishimo bisendereye ku bakunzi b'umuziki nyarwanda byumwihariko abakunzi ba Gakondo. Ntagushidikanya, abanyarwanda benshi bazaba berekeje amaso yabo muri Camp Kigali muri iki gitaramo ndangamuco nyarwanda gisanzwe kiba buri mwaka.

Iri serukiramuco ngarukamwaka rizayoborwa n'umunyamakuru Lucky Nzeyimana uzwiho kuticisha irungu abitabiriye ibirori ayobora, riririmbemo ibyamamare mu njyana gakondo ari bo Itorero Intayoberana, Ruti Joel, Victor Rukotana, Chrisy Neat, Himbaza Club, J-Sha n'umukirigitananga Siboyintore akaba n'umuhanga mu mbyino gakondo.

Amatike yo kwinjira muri iki gitaramo ari hanze. Itike ya macye yiswe 'Bisoke' ni 10,000 Frw, ikurikiyeho yiswe 'Muhabura' iragura 25,000 Frw naho itike iruta izindi yiswe 'Karisimbi' iragura 50,000 Frw. Amatike ari kuboneka mu buryo bw'ikoranabuhanga unyuze ku rubuga www.noneho.com. Kanda HANO ugure itike.

Umuyobozi Mukuru wa Unveil Africa yateguye Unveil Africa Fest, Uwase Clarisse, yabwiye InyaRwanda ko abazagura amatike yo mu cyiciro cya Kalisimbi, bazahabwa ku buntu ikirahuri cya Wine cyangwa ikirahuri cya Fresh Juice ku batanywa inzoga. Ni mu gihe abo mu cyiciro cya Muhabura bazahabwa Juice/Jus iri mu icupa cyangwa icupa ry'amazi.

Yizeye neza adashidikanya ko iki gitaramo kizatanga ibyishimo byumwihariko ku bakunzi b'umuziki gakondo.Avuga ko ari ahantu heza umuntu akwiriye gusohokanira n'inshuti ze mu kwishimira ko umwaka wa 2024 urangiye mu mahoro.

Ibigwi bya Siboyintore uzasusurutsa abazitabira "Unveil Africa Fest 2024":

Umukirigitananga Siboyintore akaba kandi umuhanga mu mbyino gakondo, amaze igihe ari umutoza w’amatorero atandukanye, unafite n’ubumenyi bwihariye mu birebana n’umuco. Ni umwe mu bazatarama bigatinda mu gitaramo Unveil Africa Fest kizaba ku wa 07 Ukuboza 2024.

Umwaka ushize, uyu mukirigitananga yatumiwe mu muhango wo gutura igitambo cyo guterekera abazimu b’i Rwanda, bizihizanya n’inshuti n’abavandimwe umunsi w’Umuganura.Ni mu gikorwa cyabaye ku wa Kane tariki 3 Kanama 2023, kibera ku Gisozi.

Cyari cyitabiriwe n’abantu mu ngeri zitandukanye barimo abasanzwe baba hafi uyu muryango, inshuti, abavandimwe ndetse n’abahanzi gakondo barimo abasizi Tuyisenge, Murekatete ndetse na Kibasumba. 

Hari kandi Itorero Ababeramuco ryatangijwe na Mushabizi, abakirigitananga barangajwe imbere na Nzayisenga Sophia; ndetse n’Itorero gakondo rya Icyusa Gakondo.

Iki kiganiro cyagarukaga ku mateka y’Umuganura cyakozwe na Rutangarwamaboko ndetse na Prof. Nyagahene usanzwe azwiho kuba intyoza mu mateka nyarwanda ndetse no kumenya ikinyarwanda kidafunguye.

Uyu munsi wo kwizihiriza ‘Umuganura’ kwa Rutangarwamaboko wari wahawe inyito ya ‘Umuganura mu bicumbi, kwa Nyagasani Imandwa Nkuru y’u Rwanda [Rutangarwamaboko]’.

Mu 2021 ubwo Patient Bizimana uri mu bakomeye mu muziki wo kuramya no guhimbaza Imana mu Rwanda, yasabaga akanakwa umugore we Karamira Uwera Gentille, uyu mukirigitanganga yataramiye abitabiriye ibi birori kuri Romantic Garden ku Gisozi mu Mujyi wa Kigali.

Ni ibirori byanaririmbyemo umuririmbyi wa gakondo mu muziki wo kuramya Imana Joshua Ishimwe (Josh Ishimwe), Prosper Nkomezi afatanyije na Rene Patrick ndetse na Aimé Uwimana.

Usibye ubu bukwe, Siboyintore amaze kuba ubukombe mu gutaramira abageni no gususurutsa abitabiriye ubukwe yifashishije impano ye, aho akunze kwifatanya n'Itorero atoza ryitwa 'Icyusa Gakondo.'

Mu ndirimbo zakunzwe cyane za Siboyintore, harimo iyo yise ‘Nkumi Nziza,’ ‘Ryabara Uwariraye,’ izo yagiye yongeramo ibirungo yifashishije umurya w’inanga zirimo ‘Nyinawumuntu,’ ‘Mwana w’ibuhoro’ n’izindi nyinshi.

Kuri ubu rero uyu mukirigitananga ategerejwe bikomeye mu iserukiramuco 'Unveil Africa Fest' rizabera muri Camp Kigali, tariki 07 Ukuboza 2024. Twakwibutsa ko amatike ari kuboneka mu buryo bw'ikoranabuhanga unyuze ku rubuga www.noneho.com. Kanda HANO ugure itike.

Ushobora kubona itike kandi mu bice bitandukanye muri Kigali nko kuri Legacy Studio, Uncles Restaurant & Lounge, Kigali Protocal Shop, Kigali Protocal Office no kuri Camellia - Makuza Plaza.

Umukirigitananga Siboyintore agiye guhurira mu gitaramo 'Unveil Africa Fest' n'ibyamamare binyuranye mu njyana Gakondo

Ni umuhanga cyane mu gukirigita inanga

Iki gitaramo cyitezweho uburyohe budasanzwe by'umwihariko ku bakunzi b'umuziki gakondo