Ubuzima bwo ku muhanda n’inkumi! Ibice 4 bigize Album Zeo Trap yaherekeresheje igitaramo-YUMVE

Uyu musore yari amaze igihe yifashisha imbuga nkoranyambaga ze agaragaza ko agiye gusohora iyi Album. Yagiye hanze kuri uyu wa Gatandatu tariki 23 Ugushyingo 2024, ni nyuma y’umwaka urenga ushize ayikoraho. 

Zeo Trap watangiye umuziki mu 2021, yaherukaga gusohora Album ya mbere yise ‘Abafana 100’ yagiye hanze mu 2023. Kuva icyo gihe, uyu muraperi yakomeje gukundwa mu buryo bukomeye, ndetse ibitaramo yatumiwemo yaciye ibintu.

Kuri Album ya mbere nta muhanzi n’umwe bakoranye; ni nako byagenze kuri iyi Album ye ya kabiri kuko nta n’umwe bakoranye.

Ariko kandi yakoranye na ba Producer banyuranye, yaba abakoze mu bijyanye no gutunganya amajwi, ndetse n’abandi bamufashije gukora ‘Video Lyrics’.

Album ye iriho indirimbo 20 zirimo:  Street Goat, Username, Kiri gute, Kristu Yezu, Impane, This&That, Theraphy, Slang, Hard Work, Cana Night, Ntago anoga yitiriye Album, Ibisimba, 4GB, Bob, Umwana wa trench, I Swear to God, Mugo, PTD, Zaza ndetse na EP Twumvira Toyi.

Mu kiganiro cyihariye na InyaRwanda, Zeo Trap yavuze ko yakozwe ku mutima no kubasha gushyira hanze iyi Album, kandi abifata nko guhigura umuhigo yari yarihaye, mu rwego rwo gufasha abakunzi ba Drill kunogerwa.

Ati “Navuga ko ari nk’umuhigo, kuko numvaga ngomba kuzatanga uyu mukoro mwiza, kuko ni Album nateguye mu mpera z’umwaka ushize, mbere y’aho bwo ntabwo numvaga ko zizaba nyinshi zikagera kuri 20.”

Ubwo yatangiraga gutegura iyi Album, uyu muraperi yavuze ko izaba iriho indirimbo 12, ariko ‘bitewe n’uko abantu bari banyitezeho byinshi nahisemo kongera umubare w’indirimbo’.

Akomeza ati “Navuga ko byari nko mu mihigo yanjye kuba nasoje Album iriho umwihariko wa ‘Drill’ kugirango abantu bamenye itandukaniro ry’injyana ndetse n’ibyo bajya bumva uko biba bimeze.”

Zeo Trap ashimangira ko Album ‘zigira agaciro iyo umuntu atakiriho’ ari nayo mpamvu yahisemo gukora indirimbo ze gusa kuri iyi Album. Atanga urugero rw’abahanzi barimo nka Mutamuliza Annonciata [Kamaliza] n’abandi bagiye bikorana Album ‘abantu bakumva ubuhanga bwabo’.

Yavuze ko umuhanzi akwiye kugira umwihariko mu byo akora bimutandukanya n’abandi. Kandi ko guhitamo kwita iyi Album ye ‘Ntago anoga’ bidashingiye ku buzima bwe, ahubwo ni byose bishingiye ku buzima bw’umuraperi. 

Ati “Ni ukubwira abaraperi cyane ko bagomba kwita ku kazi kabo. Kuko ibintu byose bari gucamo, hari igihe bizajya ku murongo, wirengagije ko wenda hari nk’amahirwe waba warambuye.”

Uyu muraperi yashimangiye ko Album ye igizwe n’ibice bine. Igice cya mbere ni ubuzima bwo ku muhanda abantu batajya bitaho. Ati “Nk’uko nyine ku muhanda biba bimeze n’amagambo bakoresha. Ese indirimbo zo ku muhanda bazibyina gute? Mbese irimo ibindi bintu umuntu utazi ibibera ku muhanda ashobora kumva.”

Igice cya Kabiri kibanda cyane ku butumwa bwo gukangurira abantu kudacika intege, guharanira gusinzira inzozi zawe ‘uko byagenda kose’. Mu gice cya Gatatu aririmba cyane ku rukundo ‘n’ubuzima abakobwa babayemo muri iyi minsi, ukuntu baba bashaka kuryoshya, kubaho mu buzima buhenze n’ibindi’.

Zeo Trap anavuga ko Album ifite igice cya kane kibanda cyane ku myandikire ‘ikakaye’ n’ikinyarwanda cyumutse. Ati “Nkora iyi Album ntabwo nashakaga ko nzajya mpura n’umuntu akambwira ngo numvise Album yawe, ahubwo nashakaga album umuntu azafatira umwanya akumva.”

Uyu musore uherutse kuririmba mu gitaramo uruganda rwa Skol rwamurikiyemo isura nshya ya Skol Malt, yavuze ko mu gihe kiri imbere azagenda akorera amashusho zimwe mu ndirimbo ze, kandi ari gutegura igitaramo cyo kuyimurika ‘mbere y’uko abanyeshuri bazasubira ku ishuri’. Yavuze ko ageze ku gusohora iyi Album ‘nyuma y’amajoro menshi naraye’.

 

Zeo Trap yatangaje ko gukora kuri iyi album ari nk’impano yageneye abafana be

 

Zeo Trap yasobanuye ko iyi Album yamufashe igihe kinini ayikoraho, kandi ahitamo kuyikorana kugirango yumvikanishe ubuhanga bwe

Zeo Trap yavuze ko buri ndirimbo iri kuri album ye yayandikanye umutima ushaka 

KANDA HANO UBASHE KUMVA INDIRIMBO 20 ZIGIZE ALBUM NSHYA YA ZEO TRAP