Manchester City mu mushinga wo kugumana Erling Haaland ku giciro cya Miliyoni £100

Manchester City irifuza ko Haaland ufite imyaka 24 yongera gusinya amasezerano mashya azamugeza mu mpeshyi ya 2027. Aya masezerano, uretse kumufasha gukomeza kwitwara neza, Man City irahamya ko azamufasha no gukomeza gutera imbere mu buryo bw’umwuga, agahabwa agaciro gakomeye nk’umukinnyi w’ingenzi ku Isi.

Haaland asigaje imyaka ibiri n’igice ku masezerano ye asanzwe, yinjiza ibihumbi £375 buri cyumweru, bivuze ko mu mwaka umwe aba yinjije Miliyoni £20. Aya masezerano mashya ashobora gutuma uyu mukinnyi yinjiza miliyoni £100 mu myaka ine cyangwa itanu iri imbere.

Kuba Guardiola yaratangaje ko azaguma muri City, biri mu byo iyi kipe izifashisha ngo yumvishe Haaland ko ari mu umukinnyi wa Man City ukomeye w’ejo hazaza. Guardiola yagize uruhare rukomeye mu gufasha Haaland kwigaragaza neza kuva yagera muri iyi kipe mu 2022, aho amaze gutsinda ibitego 105 mu mikino yose.

Ubwo yari kumwe n’ikipe y’igihugu cya Norvege mu byumweru bishize, Haaland yavuze ari ibyishimo gukorana na Guardiola: Ati: "Ndizera ko Pep azongera gusinya. Yagize uruhare runini mu buryo nakinaga mu myaka ibiri n’igice. Nkunda Pep kandi nizeye ko nawe ankunda."

Abayobozi ba Manchester City bashaka kubaka ikipe itajegajega, kandi kugumana Haaland bizaba ari ikimenyetso gikomeye cy'uko iyi kipe ishaka kugumana umuvuduko wayo mu mupira w'amaguru.

Nk’uko Guardiola yabaye inkingi ya mwamba mu gutuma iyi kipe ikomeza kuba ku isonga, Manchester City irifuza ko Haaland aba igicumbi cy'umushinga wo kugumana intsinzi mu gihe kirekire atsinda ibitego, ndetse akanandikwa mu banyabigwi b’ingenzi ba man City.

Nyuma y'uko Pep Gualdiola yemeye kongera amasezerano muri Man City, ikipe irashaka kongera amasezerano n'agaciro bya rutahizamu Erling Haaland