Shampiyona y’abatarengeje imyana 17 mu bagore igiye gukinwa harimo akaboko ka FIFA -AMAFOTO

Muri gahunda yo gutangiza shampiyona y’abatarengeje imyaka 17, ishyirahamwe ry’umupira w’amaguru mu Rwanda rifite icyizere ko mu cyiciro cy’abagore uyu mukino uzatera imbere cyane kuko abakinnyi bazajya bagaragara bakiri bato, aho usanga mu Rwanda uyu mukino utaratera imbere cyane mu cyiciro cy’abagore.

N’ubwo shampiyona y’abatarengeje imyaka 17 mu bagore igiye gutangira muri 2024, ishyirahamwe ry’umupira w’amaguru mu Rwanda ryamuritse uyu mushinga mu ishyirahamwe r’umupira w’amaguru ku isi, FIFA, mu mpera za 2022 maze uhabwa umugisha, none ku itariki 17 Ugushyingo uratangira amakipe ameze neza kubera inkunga ya FIFA.

FIFA imaze imyaka ine itangije gahunda yo guteza imbere umupira w’amaguru mu bagore, aho itera inkunga mu byiciro bitandukanye ariko igafasha ishyirahamwe ryatanze umushinga ufite igenamigambi rigera mu myaka ine, na FERWAFA ikaba yaratanze umushinga muri FIFA wo gutangiza shampiyona y’abatarengeje imyaka 17 mu bagore.

Mu makipe azatangira shampiyona ku cyumweru mu cyiciro cy’abagore, yahawe ibikoresho bihagije harimo imyambaro yo gukinana ubwoko bubiri, uturindantoki tw'abazamu dutatu kuri buri kipe, imyambaro yifashishwa mu myitozo, imipira 20 ikinwa n’abakinnyi babigize umwuga, imipira ine ikinwa n’abana, anahabwa amafaranga.

Ku itariki 17 Ukwakira 2024 hatangijwe shampiyona y’abatarengeje imyaka 17 mu cyiciro cy’abagore, kugeza ubu amakipe 12 niyo yamaze kwiyandikisha azakina icyiciro cya mbere.

Shampiyona y’abatarengeje imyaka 17 mu bagore igiye gukinwa mu buryo bwihariye ariko ikinwa kinyamwuga. Mu myaka yabanje iyi Shampiyona yajyaga ikinwa nta gahunda, aho nko muri 2022 yakinwe iriko igakinwa mu buryo bw’ibigo by’amashuri n’andi makipe asanzwe ariko nyuma yaho muri 2023 ntikinwe muri 2023.

Shampiyona y’abagore mu batarengeje imyaka 17 izanye imigisha idasanzwe kuko FIFA yateye inkunga umupira w’abagore mu byiciro bitatu harimo Womens Football Campaign ijyanye no gukundisha abana bato b’abakobwa umupira w’amaguru, Coaching Mentorship bijyanye no kongerera ubumenyi abatoza na Club Licencing, aho amakipe ahabwa uburenganzira bwo gukina shampiyona zijyanye n’aho umupira ugeze muri iki gihe.

Ku nkunga y’amafaranga FIFA yatanze ibihumbi 10$ yo gufasha muri gahunda ya Womens Football Campaign inatanga ibikoresho byo gukoresha muri iyo gahunda.

Muri gahunda ya Club licencing, FIFA yatanze inkunga y’ibihumbi 25$. Ni mu gihe mu gutegura shampiyona y’abatarengeje imyaka 17 mu bagore ho FIFA yatanze inkunga y’ibihumbi 50$ inatanga ibikoresho byo kwifashisha muri iyi mukino.

Perezida wa FERWAFA Munyantwari Alphonse yashimangiye ko gutangiza shampiyona y’abatarengeje imyaka 17 mu bagore ari igikorwa kimaze igihe gitegurwa.

Munyantwali Alphonse yagize ati: "Iki ni igikorwa kiri muri gahunda yateguwe y’ibikorwa tuzakora muri iyi myaka mu mupira w’abagore. Ni igikorwa tuzanakora dutanga inkunga mu bikoresho ndetse n’amafaranga.

Ibyateganyijwe bizahabwa amakipe y’abatarengeje imyaka 17 mu bagore harimo ibikoresho, imyenda, ndetse n’amafaranga azabafasha uko ari amakipe 12 ashamikiye ku makipe yo mu cyiciro cya mbere.

Amakipe yahawe imyenda ihagije, imipira yo gukina ndetse banahabwa amafaranga hafi miliyoni enye kuri buri kipe. Amafaranga bazayabona mu byiciro aho icyiciro cya mbere akaba ari kuri uyu wa Gatanu, iby'ibanze birahari kugira ngo shampiyona y’abagore ikinwe neza.

Perezida wa FERWAFA yasabye amakipe yahawe ibikoresho kuzabifata neza, anasaba abayobozi b’amakipe kuzaharanira gukora kinyamwuga kugira ngo umupira w’amaguru mu bagore utere imbere.

Munyankaka Ancille komiseri ushinzwe iterambere ry’umupira w’amaguru mu bagore muri FERWAFA, yavuze ko ari iby’agaciro kuba shampiyona y’abatarengeje imyaka 17 mu bagore igiye kubaho, kuko ngo bari bamaze imyaka myinshi babyifuza.

“Icya mbere ni uko tugiye gukina amarushanwa y’abatarengeje imyaka 17, ibikoresho birahagije, ikindi kandi hari ubuyobozi. Ni igikorwa cyo kwishimira kandi natwe twakoze umushinga twarabyishimiye.

“Amakipe bayahaye amafaranga mu byiciro aho icyiciro cya mbere ikipe yahawe miliyoni 1.8 Frw andi bakazayahabwa mu mikino yo kwishyura.

Ancille nk’intyoza mu mupira w’amaguru mu bagore yashimangiye ko imbogamizi zisanzwe mu mupira w’amaguru mu bagore zitazagaragara muri shampiyona y’abatarengeje imyaka 17 kubera ko ibikoresho byose bihari, ndetse amakipe akaba yanahawe amafaranga yo kuzifashisha.

Kugeza ubu amakipe 12 azakina icyiciro cya mbere mu batarengeje imyaka 17, ashamikiye ku makipe n’ubundi asanzwe akina icyiciro cya mbere ariyo Rayon Sports WFC, Indahangarwa WFC, Kamonyi WFC, Inyemera WFC, As Kigali WFC, Bugesera WFC, APR WFC, Muhazi WFC, Police WFC, Forever G WFC, Fatima WFC na Mutunda WFC.

Amakipe azakina shampiyona y'abatarengeje imyaka 17 mu bagore yahawe imipira ihagije yo gukina

Perezida wa FERWAFA Munyatwali Alphonse umwe mu bishimiye inkunga ya FIFA yo guteza imbere umupira w'amaguru mu bagore mu Rwanda

Amakipe azakina shampiyona y'abatarengeje imyaka 17 mu bagore yahawe imyambaro ihagije