Yvonne Chaka Chaka yagaragaje ruswa nk'imungu ituma abagore batisanga mu muziki

Ibi yabigarutseho mu nama ya ACCES iri kubera i Kigali ku nshuro ya mbere ikaba igomba guherekezwa n’ibitaramo bibiri bizataramamo abahanzi nka Nasty C, Bushali, Ish Kevin n’abandi benshi muri Africa.

Ku munsi wa kabiri w’iyi nama, umuhanzikazi Yvone Chaka Chaka wigwijeho ibigwi mu muziki wa Africa, niwe wari mu bategerejwe cyane ko avuga ku rugendo rwe nk’umuhanzikazi w’umugore wakoze ibitangaza ku mugabane wa Africa ndetse n’amasomo barumuna be bashobora kumwigiraho.

Yatangiye avuga ko ibinyacumi bine amaze mu muziki bitigeze byoroha ariko yabashije gushikama akabasha gukora umuziki mu buryo bwari bugoye ariko akemera ibimugora agashyira imbere icyo ashaka cyane.

Yavuze ko umuziki nubwo benshi bawukora bishimisha, umuziki ni kimwe mu bintu bikomeye cyane dore ko ari kimwe mu biranga umuco wa Africa ndetse ukaba Wabasha gutunga uwukora ndetse n’abazamukomokaho.

Chaka Chaka yavuze kandi ko umuziki kitakiri ikintu cyo gukora nta gahunda ahubwo ari ibintu bikwiye kwishyura ubikora nk’uko umucuruzi nawe agurisha kandi akishyurirwa ibyo yacuruje.

Yongeye gusaba abakora mu bigo bishinzwe kurinda umutungo w’abahanzi kuba hafi abahanzi byumwihariko abo muri Africa kugira ngo bizabe umutungo uzabatunga n’ikindi gihe. Ati “Haba hari ibigo bifasha kwandika imitungo y’abahanzi? Wowe nk’umuhanzi, ni wowe ukwiye kwandikisha umutungo wawe. Hari abahanzi bafata ibihangano byabo bakabishyira hanze hanyuma abandi bakabyifatira, ni gute utekereza ko uzabyishyurirwa?’

Agaruka ku ruhare rw’abagore mu iterambere ry’umuziki wa Africa, Yvonne Chaka Chaka yavuze ko igihe cyageze ngo n’abagore bisange muri uru ruganda rw’umuziki cyane ko nabo bafite byinshi bakora kandi byafasha iterambere ry’umuziki.

Yagize ati “Njya mbwira abahungu bange ngo habaye hatariho umugore ntabwo nabo baba bari ku Isi. Kuri ubu igihe ni iki kugira ngo ibintu byose bizemo uburinganire bungana. Haba umugore cyangwa umugabo, bafite ubushobozi bungana mu gukora ibintu bitandukanye niyo mpamvu nta muntu ukwiye kugibwaho impaka ku kazi ke."

Aha niho yahise akomereza asaba abakora mu gisata cy’umuziki guhagarika ibyo gushaka gufatirana abakobwa cyangwa abagore ngo babasabe ibitandukanye n’ibyo bagakwiye kuba batanga kugira ngo bafashwe kubera yuko iyo binyuze muri izo nzira ubushobozi bwose bw’umugore butagaragara.

Yagize ati “Ndashaka kwisabira abagabo bari ku ruhembe rw’umuziki, Umukobwa naramuka aje gushaka ubufasha kuri mwe, ntimukamwake ibindi (Aha yavugaga kuri za ruswa zishingiye ku gitsina) kubera ko rimwe na rimwe ntabwo batanga imbaraga zabo."

Yasabye kandi abakobwa kwiyumvamo ko ari abanyembaraga, abanyabwenge kandi bashobora gukura umuziki wa Africa ku rwego rumwe ukagera ku rundi rwego. Ati “Abagore mukwiye kwemera kwirwanaho nk’uko nabivuze. Mu biganiro nagiye nkora, nagiye nsaba ko abagore bahabwa amahirwe angana n’abagabo kuko hari byinshi bakora ku muziki. Abagore bakwiye kandi kwiyumvamo ko bashyigikiwe, bashoboye kandi bagahabwa n’inama n’amahugurwa."

Yvonne Chaka Chaka yongeye kugaruka ku bibazo yahuye nabyo ubwo yatangiraga umuziki nyuma y’uko yari amaze gutsindwa mu ishuri ry’amategeko hanyuma agahita yumva ko agiye gukora umuziki kandi ugomba kuzamutunga.

Yagize ati “Ndatekereza ko twese tugira ibibazo byo mu mutwe atari abagore gusa ahubwo n’abagabo. Uru ni uruganda aho imbwa irya indi. Ugomba kumenya uwo uriwe cyane cyane muri uru ruganda. Ngewe mbifata nk’akazi nk’akandi kose.

Nigaga amategeko ndatsindwa hanyuma mfata umwanzuro wo gukora umuziki. Ntabwo nigeze niyumva nk’umuntu w’igitangaza usumba abagura ibyo nakoraga ahubwo nabifataga nk’akazi nk’uko muganga abyuka akajya ku kazi ko kuvura."

Yongeye gusaba abahanzi kutishyira hejuru ahubwo bagaomeza gukorera rubanda nk'uko babikora mu gihe cya mbere y'uko bamenyekana bagafata abantu bose nk'abakiriya b'ibyo bakora kuko aribo bagenerwa bikorwa.

Yagize ati "Kubwo amahirwe macye, twe nk’abahanzi turi ijisho rya rubanda aho uba uhanzwe amaso ugashimwa uyu munsi ejo ukanengwa. Iyo umuhanzi agitangira, agenda asaba abantu kumva indirimbo ze yamara kugera ku rwego rwiza ntiyongere kwikoza abo bantu batumye agera aho ndetse yewe agashaka abamucungira umutekano."

Reba indirimbo "Every woman needs a man" ya Yvonne Chaka Chaka yavuze ko yakoze agaragaza ko umugabo n'umugore bakenerana ari naho ahera avuga ko haba umugabo n'umugore bakwiye gutahiriza umugozi umwe mu kuzamura ibendera ry'umuziki wa Africa.