Kaminuza y’u Rwanda yohereje ku isoko ry’umurimo abanyeshuri barenga 8,000 barimo abanyamahanga 100-AMAFOTO

Kuri uyu wa Gatanu tariki 25 Ukwakira 2024, muri Kaminuza y'u Rwanda, Ishami rya Huye, habereye ibirori byo gutanga impamyabumenyi ku banyeshuri bagera ku 8,068 basoje amasomo yabo muri UR mu mwaka wa 2024.

Ni ku nshuro ya 10, Kaminuza y'u Rwanda ishyize ku isoko ry'umurimo abanyeshuri bayizemo.

Abanyeshuri basoje amasomo bize muri koleji esheshatu zigize Kaminuza y’u Rwanda zirimo Koleji Nderabarezi (2,308) Koleji y’Ubumenyi n’Ikoranabuhanga (1,663), Koleji yigisha iby’Ubugeni, Indimi n’Ubumenyi bw’Imibereho y’Abaturage (760), Koleji yigisha iby’Ubucuruzi n’Ubukungu (1,453), Koleji y’Ubuvuzi n’Ubumenyi mu by’Ubuzima (1,157) ndetse na Koleji y’Ubumenyi n’ubuvuzi bw’Amatungo (722).

Abahawe impamyabumenyi bose hamwe ni 8,068, barimo ab'igitsinagore 3,109 n'ab'igitsinagabo 4,959. Aba banyeshuri barimo abasoje icyiciro cya kabiri cya kaminuza, icya gatatu cya kaminuza n'abahawe impamyabumenyi y'Ikirenga, PhD.

Abagera kuri 53 nibo bahawe Impamyabumenyi y’Ikirenga, PhD, mu gihe 946 bahawe impamyabumenyi y’Icyiciro cya Gatatu cya Kaminuza, naho 6,657 bahabwa Impamyabumenyi y’Icyiciro cya Kabiri cya Kaminuza.

Ibirori byo gutanga impamyabumenyi ku banyeshuri basoje amasomo muri Kaminuza y'u Rwanda byabanjirijwe n'umutambagiro w'abarimu n'abakozi ba UR. Wayobowe n’itsinda ry’abanyeshuri biga mu Ishuri rya Muzika ry’u Rwanda, ryahoze ku Nyundo.

Umuyobozi Mukuru ya Kaminuza y'u Rwanda, Prof Didas Kayihura Muganga, yibukije abasoje amasomo muri UR ko bahuye n’imbogamizi ariko zabahinduye abayobozi n’abatekerereza ahazaza.

Ati: "Muzibuke guca bugufi. Twizeye ko mwe nka ba ambasaderi ba Kaminuza y’u Rwanda muzagaragaza itandukaniro."

Yabibukije ko umwanya bamaze muri Kaminuza y’u Rwanda wabaye uwo kubaremamo abahanga bazatanga serivisi zo ku rwego rwo hejuru mu minsi iri imbere.

Ati: “Ubumenyi mwahawe bushobora kuzana impinduka, bushobora gutuma muhanga ibishya kandi bukazana iterambere. Ibyo ni byo twiyemeje nka Kaminuza.”

Dr. Kayihura yagaragaje ko mu myaka 10 ishize hakozwe iminduka mu myigishirize y’amashuri makuru na Kaminuza, by’umwihariko habaho guhuza amashuri makuru yose ya Leta abyara Kaminuza y’u Rwanda yafashije gukorera hamwe no guteza imbere uburezi bufite ireme mu nzego zose.

Minisitiri w'Uburezi, Nsengimana Joseph, yashimiye abanyeshuri basoje amasomo yabo muri Kaminuza y’u Rwanda n’umuhate wabaranze ku ntebe y’ishuri.

Ati: “Uyu munsi ni umunsi wanyu namwe kuko aba bana banyu ntibari gushobora kwigeza aho bageze uyu munsi. Ni ngombwa ko namwe tubashimira ko mwafatanyije na Kaminuza y’u Rwanda ngo babe bageze ku kigero gishimishije.’’

Minisitiri w’Intebe, Dr Ngirente Edouard, yabwiye abasoje amasomo ko bahesheje ishema imiryango yabo ndetse n’Igihugu.

Yagize ati: “Guverinoma ibatezeho umusaruro ukomeye mu gukomeza guteza imbere uru Rwanda kandi turabifuriza ishya n’ihirwe mu buzima bwo hanze y’ishuri no mu mirimo itandukanye muzakorera Igihugu cyacu.”

Yongeyeho ko adashidikanya ko abanyeshuri basoje amasomo yabo muri Kaminuza y’u Rwanda, bahawe ubumenyi bwuzuye. Ati “Twizeye ko muzadufasha gukemura ibibazo tugihura nabyo. Mu gihe mugiye hanze gukorera Igihugu, dutegereje ko muzazana impinduka zizahindura imibereho y’aho muturuka.’

Minisitiri Dr Ngirente yavuze ko mu basoje amasomo harimo abarenga 100 baturuka mu bihugu 24 bitandukanye byo ku Isi. Ati: “Bigaragaza ko Kaminuza y’u Rwanda ikomeje kunoza ireme ry’uburezi buyitangirwamo ku buryo n’abanyeshuri baturutse hanze y’u Rwanda bishimira kuyigamo.’’

Ibirori byo gutanga impamyabumenyi ku basoje amasomo muri Kaminuza y'u Rwanda byitabiriwe n'abayobozi mu nzego nkuru za Leta, abayobora ibigo byigenga, abikorera n'abandi.

Kaminuza y'u Rwanda yohereje abarenga 8,000 ku isoko ry'umurimo

Ni ibirori byabanjirijwe n'umutambagiro w'abarimu n'abakozi ba UR

Wari uyobowe n'abanyeshuri biga ku Nyundo

Abanyeshuri, inshuti, abavandimwe n'ababyeyi bari babukereye mu muhango wo gutanga impamyabumenyi ku banyeshuri basoje amasomo yabo muri Kaminuza y'u Rwanda 

Ni umuhango witabiriwe n'abayobozi bo mu nzego zinyuranye

Minisitiri w'Intebe, Dr Edouard Ngirente yitabiriye uyu muhango, atanga impanuro ku banyeshuri basoje amasomo yabo kandi ashimira n'ababaherekeje muri uru rugendo

Akanyamuneza ni kose ku banyeshuri 8,068 bahawe impamyabumenyi na Kaminuza y'u Rwanda

Bibukijwe ko Guverinoma ibitezeho umusaruro ukomeye

Umuyobozi wa UR, Prof Didas Kayihura yabibukije ko umwanya bamaze muri iyi kaminuza wabaye uwo kubaremamo abakozi bashoboye bakenewe ku isoko ry'umurimo

Minisitiri w'Uburezi, Nsengimana Joseph yashimiye abanyeshuri basoje

Minisitiri Dr Ngirente yasabye abanyeshuri basoje kwitwara neza

Minisitiri w'Intebe ubwo yafatanaga ifoto y'urwibutso n'abanyeshuri bahawe impamyabumenyi

Itorero Inyamibwa za Kaminuza y'u Rwanda niryo ryasusurukije abitabiriye ibi birori binyuze mu mbyino zibereye ijisho

Byari ibirori biryoheye ijisho

AMAFOTO: RBA