Israel Mbonyi na Apôtre Mignonne bageze mu Bwongereza mu bikorwa by’ivugabutumwa

Israel Mbonyi ari kumwe na Apôtre Mignonne ndetse n’ababaherekeje bageze mu Murwa Mukuru wa kiriya gihugu mu ijoro ryo kuri uyu wa Kane tariki 12 Nzeri 2024, bakirwa n'ababatumiye muri iki gikorwa cy’ivugabutumwa ryagutse.

Iki gikorwa kirabera mu nyubako ya InterContinental London, guhera kuri uyu wa Gatanu tariki 13 kugeza ku wa Gatandatu tariki 14 Nzeri 2024. 

Apôtre Mignonne ni we mwigisha w’ijambo ry’Imana kandi ni we uzayobora iki gikorwa, ni mu gihe Israel Mbonyi azafasha abantu kwegerana n’Imana binyuze mu ndirimbo ze zitandukanye.

Women Foundation Ministries itangaza ko mu bandi batumiwe kubwiriza ijambo ry'Imana harimo na Yemisi Ashmolowo. Kandi, kwinjira muri ibi bikorwa ni ubuntu.

Si ubwa mbere, Israel Mbonyi ataramiye mu Bwongereza, kuko muri Kanama 2019 yakoreye ibitaramo bikomeye muri iki gihugu ahereye mu Mujyi wa Manchester uri mu Burengerazuba bw’Amajyaruguru y’u Bwongereza.

Agiye gutaramira muri kiriya gihugu, mu gihe mu minsi yakoreye ibitaramo bikomeye mu Bubiligi, muri Uganda ndetse no muri Kenya. Kandi, ari kwitegura kuzajya gutaramira abakunzi be muri Tanzania, muri Afurika y’Epfo n’ahandi.

Umuhamagaro wa Israel Mbonyi

Israel Mbonyi avuga ko yahamagawe n’Imana ubwo yigaga mu mashuri yisumbuye, kuva ubwo atangira kuyikorera mu mashyi no mu mudiho. Icyo gihe cyabaye intangiriro ye yo guhanga indirimbo zihimbaza kandi zigaha ikuzo Imana.

Uyu musore w’imyaka 32 y’amavuko, yari asanzwe ari umukinnyi wa Karate, kandi yabonaga ariho impano ye izerekeza ariko yaje kwegurira ubuzima bwe Kristu.

Israel Mbonyi asobanura ‘umuhamagaro w’Imana’ nk’ikintu Imana igushyira ku mutima’ kandi waba utaragikora ukajya wumva ari nk’umutwaro wikoreye.

Yari asanzwe yandika indirimbo akaziha korali. Ariko akimara guhamagarwa n’Imana, yanamuhaye indirimbo yitwa ‘Yankuyeho urubanza’ ari nayo yabaye iya mbere yahereyeho.

Kuva yahamagarwa n’Imana, yahise yumva urukundo rudasanzwe rw’umuziki no gucuranga muri we.

Icyo gihe yari umukinnyi wa Karate, ariko ibyo byose yabishyize ku ruhande. Ati “Numva nsigaranye gusa umutima wo kuririmba.”

Israel Mbonyi avuga ko yakundaga gukina karate, ariko kuva yatangira kuririmbira Imana yabiburiye umwanya, igice kinini gitwarwa n’umuziki gusa.

Asobanura ko imbuga zicuririzwaho umuziki zabaye urubuga rwiza rwo gushyigikira umurimo w’Imana, kandi umuntu akabikora yibwirije.

Ati “Numva ari uburyo bwiza Imana yadukoreye bwo gusangiza abantu ibihangano byacu, kandi natwe bikatugirira umumaro.”

Israel yigeze kubwira BBC ko hari inyungu ziva mu bihangano umuhanzi ashyira ku mbuga zinyuranye zicururizwaho umuziki, bityo bigafasha umuhanzi gukomeza gukora.

Israel Mbonyi ari kumwe na Apôtre Mignonne bamaze kugera mu Mujyi wa London mu Bwongereza mu bikorwa by’ivugabutumwa ryagutse 

KANDA HANO UREBE AMASHUSHO Y'INDIRIMBO 'HERI TAIFA'