Kwinjiriza abafana ubuntu muri Stade Amahoro umukino ugiye gutangira bizagira izihe ngaruka?

Ku wa Kabiri w’iki Cyumweru ni bwo ikipe y’igihugu y’u Rwanda, Amavubi, yari yakiriye iya Nigeria kuri Stade Amahoro mu gushaka itike y’igikombe cya Afurika cya 2025 kizabera muri Morocco.

Mbere y’iminsi 5 ngo uyu mukino ube, ishyirahamwe ry’umupira w’amaguru mu Rwanda, FERWAFA, ryari ryashyize hanze ibiciro byo kwinjira kuri uyu mukino  aho ahasanzwe hejuru hari 2000 Frw, ahasanzwe hasi hakaba  2000 Frw, VIP ikaba  ibihumbi 20 Frw naho Business Suite iri ahazwi nka ‘Executive Seat’ ikaba ibihumbi 50 Frw ndetse na ‘Executive Box’ ikaba 1.000.000 Frw.

Nyuma yo gushyira aya matike hanze benshi bagaragaje ko ibiciro byayo bihanitse kandi ari n’umukino uzakinwa ku munsi w’umubyizi aho abenshi baba bari mu kazi.

Ku munsi w’umukino habura amasaha abiri ngo ukinwe, FERWAFA yashyize hanze itangazo rivuga ko kwinjira kuri uyu mukino ahasanzwe hose ari ubuntu. 

Byari nyuma yuko irebye ahagurishirizwa amatike igasanga abayaguze ni bake kandi hakenewe abafana baza gutera ingabo mu bitugu abasore b’Amavubi kugira ngo bashake umusaruro mwiza ku buzi na bwiza.

Ibi ntabwo ari ubwa mbere byari bibaye kuko ubwo APR FC yakiraga Azam FC mu mukino wo kwishyura w’ijonjora ryibanze rya CAF Champions League muri Stade Amahoro, nabwo byarabaye.

Iyi kipe y’Ingabo z’igihugu mbere y'uko umukino ukinwa yari yavuze ko ahasanzwe hasi ari 1,000 Frw naho ahasanzwe hejuru bikaba 2000 Frw.

VIP byari ibihumbi 10 Frw naho VVIP ari 30 Frw. Icyiciro cya ‘Executive Seat’ cyari ibihumbi 100 Frw, mu gihe ‘Executive Box’ yari ibihumbi 900 Frw.

Ubwo umukino waburaga amasaha macye, APR FC yatangaje ko kwinjira kuri uyu mukino ahasanzwe hose ari ubuntu. 

Kwinjiriza abafana ubuntu muri Stade Amahoro umukino ubura iminota micye ngo ukinwe bizagira izihe ngaruka?

Ikibazo gikomeye ntabwo ari ukwinjiriza ubuntu ku mukino runaka kuko  ntabwo ari ubwa mbere byaba bibaye, ahubwo ni igihe uwo mwanzuro ufatirwa.

Ku mukino w’Amavubi na Nigeria bamwe mu bafana bari baguze amatike kare bumvikanye bicuza impamvu babikoze kare  none kwinjira bikaba bigizwe ubuntu ndetse bamwe ntibanumve ukuntu bagiye kwicarana n’abandi binjiye nta kintu na kimwe bishyuye.

Bamwe muri bo bafashe umwanzuro wo kutazongera kugura amatike  ahubwo bakazajya bategereza kugeza agizwe ubuntu. 

Ikigaragara ni uko ibi bikorwa byo kugira amatike ubuntu umukino ubura iminota micye ngo utangire mu gihe byakomeza nta mufana wazongera kujya agura itike mbere ahubwo byazaba akamenyero kugeza ubwo amakipe agiye abihomberamo.

Gufata umwanzuro wo kwinjiriza abafana ubuntu umukino ubura iminota micye ngo utangire bishobora kuzagira ingaruka zo gutuma hari abafana banga kugura amatike

Ku mukino Amavubi yakinnyemo na Nigeria abafana bamwe binjiriye ubuntu abandi barishyura