Limmassol yo muri Cyprus yerekanye Imanishimwe Emmanuel Manguende nk'umukinnyi wayo mushya

Mu kwezi kwashize ni bwo hagiye amakuru hanze ko uyu mukinnyi yasinyiye iyi kipe amasezerano y'umwaka umwe nyuma y'uko adakomezanyije na AS Far Rabat yo muri Morocco.

Nubwo yari yarasinye ntabwo yari yakerekanywe ku mugaragaro ariko kuri uyu wa Mbere iyi kipe ya Limmassol yamwerekanye nk'umukinnyi wayo mushya mu gihe cy'umwaka umwe.

Iyi kipe yashyize ku mbuga nkoranyambaga zayo amashusho ya Imanishimwe Emmanuel Manguende arimo akina umupira iyaherekesha amagambo amuha ikaze.

AEL Limassol isanzwe ikina shampiyona y'icyiciro cya mbere muri Cyprus yashinzwe mu myaka 93 ishize, ikaba yakirira kuri Stade yitwa Alphamega Coleman ifite ubushobozi bwo kwakira abantu ibihumbi 11.

Iyi kipe yakinnyemo abandi Banyarwanda nka Ndikumana Hamad Katauti na Edwin Ouon, niyo ifite ibikombe byinshi muri iki gihugu bigera kuri 17 birimo 7 bya shampiyona y'icyiciro cya Mbere ndetse ni nayo kipe ikuze kurusha andi makipe yose.

Imanishimwe Emmanuel Manguende yerekeje muri iyi kipe nyuma yo gutandukana na AS Far Rabat yo muri Morocco yari yaragezemo mu 2021 avuye muri APR FC aguzwe arenga Miliyoni 400 z'Amanyarwanda.

Uyu myugariro usanzwe abanza mu ikipe y'Igihugu y'u Rwanda, "Amavubi", yari avuye muri APR FC yari yaragezemo mu 2015 avuye muri Rayon Sports yari yaragezemo mu 2014.

Imanishimwe Emmanuel Manguende yerekanywe nk'umukinnyi mushya wa Limmassol yo muri Cyprus