Mahatma Ghandi yatawe muri yombi! Ibyaranze uyu munsi mu mateka y'Isi

Ibintu biba byarabaye kuri iyi tariki mu myaka yashize ni byinshi cyane ariko uyu munsi, InyaRwanda yaguhitiyemo bimwe mu by’ingenzi bidateze kwibagirana mu mateka y’isi.

Bimwe mu byaranze uyu munsi mu mateka:

1936: Mu mikino ngororangingo yo mu mpeshyi (Summer Olympic Games), Jesse Owens yatwaye umudali wa zahabu yikurikiranyije, bityo aba umuntu wa mbere ukomoka muri Leta Zunze Ubumwe za Amerika washoboye gutwara imidali igera kuri ine ku nshuro imwe y’imikino ngororangingo.

1942: Mahatma Ghandi wari umuyobozi w’u Buhinde yatawe muri yombi n’ingabo z’Abongereza ubwo yari agiye gutangiza Quit India Movement yasabaga ubwigenge bw’igihugu cye, izi ngabo zamufatiye mu Mujyi wa Bombay.

1945: Mu ntambara ya kabiri y’isi yose Umujyi wa Nagasaki wo mu Buyapani wasenywe bikomeye n’igisasu cya kirimbuzi cyatewe n’indege y’intambara ya Leta Zunze Ubumwe za Amerika yitwa United States B-29 Bockscar. Iki gisasu cyahitanye abagera ku bihumbi magana atatu na mirongo icyenda.

1974: Biturutse ku gisebo gikomeye mu mateka ya Leta Zunze Ubumwe za Amerika kizwi nka Watergate Scandal, Perezida Richard Nixon yeguye ku mirimo ye asimburwa na Visi Perezida we Gerald Ford.

Richard Nixon yabaye Perezida wa mbere mu mateka y’iki gihugu weguye ku mirimo ye.

1999: Perezida w’u Burusiya Boris Yeltsin yakuye ku butegetsi Minisitiri w’Intebe Sergei Stepashin, iyi ikaba yari inshuro ya kane amukuru muri guverinoma.

1999: Diet of Japan, wagereranya n’inteko ishinga amategeko yemeje Hinomaru nk’ibendera ry’igihugu ndetse na Kimi Ga Yo nk’indirimbo yubahiriza igihugu.

2001: Perezida wa Leta Zunze Ubumwe za Amerika George W.Bush yatangaje ko yiyemeje gufasha abakoraga ubushakashatsi ku bijyanye n’iyororoka ry’ingirangingo.

Bamwe mu bavutse uyu munsi:

1961: John Key, yabaye Minisitiri w’Intebe muri New Zealand

1973: Filippo Inzaghi wabaye umukinnyi w’umupira w’amaguru ukomeye ukomoka mu Butaliyani.

Bamwe mu bitabye Imana uyu munsi:

2004: Robert Lecourt, umunyepolitiki ukomoka mu Bufaransa, yabaye Perezida w’urukiko rw’Umuryango w’ibihugu by’Ubumwe bw’i Burayi.

2007: Joe O’Donnell, umunyamakuru wari gafotozi ukomeye ukomoka muri Amerika.