Mukura VS yamanitse amaboko yisegura ku bafana bayo

Ni ibikubiye mu butumwa iyi kipe yashyize hanze ibunyujije ku mbuga nkoranyambaga zayo kuri uyu wa Kane. Mukura VS yandika iti"Bitewe n'impamvu zitaduturutseho ,tubabajwe no kubamenyesha ko igikorwa cya Mukura Season Launch gisubitswe

Turasaba abakunzi ba Mukura VS et Loisirs kuba hafi y'ikipe no gukomeza kuyishyigikira muri shampiyona izatangira yakira Gasogi United ku wa 15/08/2024 kuri Stade ya Huye".

Iyi kipe yiseguye ku bafana bayo nyuma y'uko itangaje ko izakina umukino wa Gicuti na Rayon Sports ku munsi w’Iboriri byiswe ‘Mukura Season Launch’ biteganyijwe tariki ya 10 Kanama 2024

Nyuma y'uko ibitangaje , FERWAFA yayandikiye iyibwira ko uyu mukino bitakunda ko uba bitewe nuko kuri uyu munsi nabwo Saa Cyenda hateganyijwe undi mukino wa Super Cup uzahuza Police FC yatwaye igikombe cy'Amahoro ndetse na APR FC yegukanye igikombe cya shampiyona.

Nubwo Mukura VS yabujijwe gukina uyu mukino yo yakomeje kuwitegura ivuga ko nta mategeko abuza umukino wabo ahari ndetse ko bitapfa gukunda ko bareka kuwukina dore ko hari n'ibirori bateguye bitakunda ko bahagarika.

Ku mugoroba wo kuri uyu wa Gatatu habayeho ibiganiro hagati ya FERWAFA na Mukura VS kugira ngo barebere hamwe uko byagenda imikino yombi ikaza nta n'umwe ubangamiye undi.

Byarangiye FERWAFA yandikiye iyi kipe iyibwira ko umukino wakikimurirwa amasaha. Mukura VS yasubije iri shyirahamwe ry'umupira ko ibyemeye ariko FERWAFA yisubiraho ivuga bitakunda ahubwo umukino wakimurirwa umunsi.

Hari amakuru yavugaga ko iyi kipe yafashe umwanzuro ko izawukina nta kindi kintu yitayeho ariko byarangiye imanitse amaboko.

Usibye kuba Mukura VS yarikuzakina umukino wa gicuti ku munsi w'ibirori byiswe " Mukura Season Launch’ ahubwo yarikuzakora n'ibindi bikorwa birimo kwerekana abakinnyi yaguze, kwerekana abafatanyabikorwa bayo ndetse n'ibindi.