Bokota Labama yahinduye umuvuno, ajya muri Musanze FC

Bokota Kamana Labama, kabuhariwe ufite inkomoko muri Repubulika Iharanira Demokarasi ya Congo, akaba yarabiciye bigacika mu Rwanda mu makipe akomeye nka APR FC na Rayon Sports, yagizwe Umutoza Wungirije wa Musanze FC.

Muri Musanze FC, Bokota Kamana Labama agiye kusa ikuvi cya Mugiraneza Jean Baptiste uzwi nka Miggy uherutse gutandukana na Musanze akajya muri Muhazi United.

Bokota Kamana Labama wabiciye bigacika ari umukinnyi, si ubwa mbere agiye gutoza umupira w'amaguru mu Rwanda na cyane ko yari umutoza wungirije muri Addax ya Mvukiyehe Juvenal.

Musanze FC yarangije shampiyona ya 2023-2024 iri ku mwanya wa gatatu, umwanya mwiza imaze kugira mu mateka yayo, yamaze no kongera amasezerano abakinnyi barimo umunyezamu Ntaribi Steven, Nduwayo Valeur na Ntijyinama Patrick bakina hagati mu kibuga na Uwiringiyimana Christophe.

Bokota w’imyaka 39 y'amavuko yamenyekanye cyane mu Rwanda ubwo yakiniraga Rayon Sports mu 2005 nyuma y’imyaka itatu yerekeza muri APR FC yakiniye umwaka umwe. Yakomereje muri Motema Pembe y’iwabo muri Repubulika Iharanira Demokarasi ya Congo mbere yo gusubira muri Rayon Sports.

Andi makipe Bokota Kamana Labama yakiniye ni Kiyovu Sports, URA FC yo muri Uganda, AS Muhanga na Musanze FC. Uyu rutahizamu wanditse amateka mu Rwanda, yanakiniye Ikipe y’Ighugu, Amavubi, guhera mu 2007.

Mu 2010, Bokota yavuye muri APR FC yirukanywe anahagarikwa na FERWAFA, umwaka adakina nyuma y’uko byatahuwe ko yakiniye amakipe abiri yo mu bihugu bibiri bitandukanye mu minsi ibiri gusa.

Byari nyuma yo kugaragara mu mukino wa Shampiyona ya Repubulika Iharanira Demokarasi ya Congo mu Ikipe y’i Kisangani yitwa Teout Solida Maleketa nyuma y’umunsi umwe agahita agera i Kigali akinjira mu kibuga asimbuye mu gice cya kabiri mu mukino w’ijonjora rya kabiri rya CAF Champions League Ikipe y’Ingabo z’Igihugu yatsinzemo TP Mazembe igitego 1-0.

Bokota Kamana Labama wabiciye bigacika ari umukinnyi mu makipe atandukanye mu Rwanda, yitezweho kubica bigacika ari umutoza wungirije muri Musanze FC