Beatha Musengamana yinjiye mu mateka: Iby’ingenzi ku ndirimbo ‘Azabatsinda Kagame’ yaciye ibintu mu bihe byo kwiyamamaza

Biragoye kuba wasanga umunyarwanda utazi aka gace k’indirimbo ngo ‘Ni intumwa y’Imana asa n'uwavuye mu ijuru, yatumwe ku banyarwanda ngo yuhagire uru Rwanda.’

Ni indirimbo "Azabatsinda Kagame", ariko benshi bakunda kuyita "Byari Byabananiye", ikaba igaruka ku bigwi bya Perezida Kagame, umukandida wa FPR-Inkotanyi ku mwanya w’Umukuru w’Igihugu mu matora yo kuwa 14-15 Nyakanga 2024.

Mu bikorwa byo kwiyamamaza, iyi ndirimbo yagarutsweho cyane bijyanye n’umurindi ifite, amagambo adasanzwe ayirimo yibutsa ko ibikorwa biruta amagambo.

Twabegeranirije amakuru adasanzwe wamenya kuri iyi ndirimbo yakozwe mu mwaka wa 2017 na Beatha Musengamana. Yifuzaga ko yaba imwe mu zari kwifashishwa uwo mwaka mu bikorwa byo kwamamaza, ariko ntiyarenga umutaru.

Mu 2024 iyi ndirimbo yaje gufata indi ntera biturutse ku gikorwa cy’Umuganda, Umunyamabanga Nshingwabikorwa w’Umurenge wa Nyamiyaga aho uyu mugore akomoka afata amashusho abari bawitabiriye bizihiwe nayo.

Nyuma aya mashusho yaje guhabwa umunyamakuru Munyaneza Theogene, ayasakaza ku mbuga nkoranyambaga ahereye ku rubuga rwa X, abantu barayikunda cyane, iza gufatwa mu buryo bw’amajwi na Beatha.

Igikundiro cyayo cyatumye hafatwa umwanzuro wo kuyisubiramo, abahanzi barimo Butera Knowless, Bwiza, King James, Bushali, Alyn Sano, Ariel Wayz na  Chris Eazy bayiririmbamo. Yatunganyijwe mu buryo bwisumbuyeho na Pastor P.

Beatha Musengamana wanditse iyi ndirimbo akanayiririmbamo, asanzwe ari umutoza n’umwanditsi w’itorero ryo muri Kamonyi ryitwa Indashyikirwa rya Nyamiyaga. Nyuma y'imyaka 7 akoze indirimbo 'Azabatsinda Kagame', mu 2024 yaryoheje bikomeye ibihe byo kwiyamamaza Beatha agaragaza ko ibikorwa biruta amagambo bityo ko abayakoresha gusa nta keza kaboAbahanzi bagize uruhare mu kwamamaza FPR Inkotanyi bafatanije na Beatha Musengamana basubiramo iy'indirimbo y'ibigwi bya Perezida Kagame

Perezida Kagame na Madamu Jeannette Kagame bari i Kicukiro bakurikirana uko iyi ndirimbo iririmbwa