Kuri uyu wa Gatatu saa cyenda ni bwo hakinwaga imikino yo ku munsi wa 5 muri iyi mikino ya kamarampaka ya shampiyona y'icyiciro cya kabiri. Kuri Mukebera Stadium ikipe ya Rutsiro FC yari yakiriye AS Muhanga ikaba yasabwaga kuyitsinda kugira ngo ihite izamuke.
Byarangiye ibigezeho itsinze ibitego 2-0 byatsinzwe na Nkubito Hamza ku munota wa 3 gusa ndetse na Hakizimana Adolphe ku munota wa 59.
Iyi kipe yo mu karere ka Rutsiro yahise ikomeza kuba ku mwanya wa 2 n'amanota 10 aho irusha amanota 6 AS Muhanga iyikurikiye amanota 6 kandi hasigaye umukino umwe.
Ubwo bivuze ko niyo uwo mukino umwe usigaye Rutsiro FC yawutsindwa n'ubundi yakomeza kuba ku mwanya wa 2 uyemerera kuzamuka mu cyiciro cya mbere.
Ku rundi ruhande ikipe ya Intare FC yari yakiriye Vision FC maze iyitsinda ibitego 3-2 gusa n'ubundi birangira nayo izamutse mu kiciro cya mbere kuko yakomeje kuba ku mwanya wa 1 n'amanota 10 aho yo izigamye ibitego 5 .
Rutsiro FC isubiye mu kiciro cya mbere nyuma yuko yari yamanutse mu kiciro cya kabiri mu mwaka ushize itsinzwe na Kiyovu Sports ku mukino w'umunsi wa nyuma mu gihe Vision FC yo ari ubwambere igiye gukina mu kiciro cya mbere.
Izi kipe zigiye gusimbura Etoile de l'Est na Sunrise FC zo zamanutse mu kiciro cya kabiri mu mwana w'imikino dusoje.
Ku munsi wa nyuma wa 6 uzasoza iyi mikino ya kamarampaka ikipe ya AS Muhanga izakira Intare FC naho Vision FC yakire Rutsiro FC kuwa Gatandatu Saa cyenda.
