Ni Umunya Africa wuzuye! Kylian Mbappe wavugishije benshi ajya muri Real Madrid ni muntu ki?

Ku itariki ya 20 Ukuboza mu 1998 ni bwo Kylian Mbappe yabonye izuba, avukira I Paris mu Bufaransa.

Nubwo yavukiye i Paris mu Bufaransa, ababyeyi be bakomoka ku mugabane wa Africa, aho Se Wilfried Mbappe akomoka muri Cameroon, naho Nyina Fayza Lamari akaba akomoka muri Algeria.

Kylian Mbappe, ntabwo ari we mwana wenyine uba mu muryango, kuko avukana na Ethan Mbappe ukinira Paris Saint-Germain, ndetse bakaba barakuranye na Jires Kembo Ekoko, umwana wakuriye mu muryango wo kwa Mbappe.

Ku myaka itandatu y'amavuko, Kylian Mbappe yatangiye urugendo rwo gukina umupira w'amaguru, arutangirira mu ishuri ry'abakiri bato ba AS Bondy ibarizwa mu Bufaransa.

Academy ya AS Bondy, Kylian Mbappe yayikiniye kuva muri 2004 ubwo yari afite imyaka itandatu, ayivamo muri 2013 ubwo yari afite imyaka 15 y'amavuko.

Muri 2013, Kylian Mbappe yatandukanye na AS Bondy ajya muri AS Monaco y’abato, ayikinira kugera muri 2015 ubwo yari amaze kugira imyaka 17 y'amavuko. 

Muri 2015, Mbappe yatangiye gukina ruhago nk'umukinnyi wabigize umwuga, atangirira muri AS Monaco ya kabiri, ayikinira imikino 12 ayitsindira ibitego bine. 

Mbappe wari umaze kwigaragaza nk'umukinnyi mwiza ukiri muto, mu mwaka wa 2016 yatangiye guhabwa amahirwe muri AS Monaco nkuru, ayikinira imikino 41, ayitsindira ibitego 16.

Muri 2017 Paris Saint-Germain yari imaze kubona impano idasanzwe ya Kylian Mbappe, umukinnyi muto wari ufite ubwenge bwo gucenga, kwiruka ndetse no gutsinda, yumvikanye na AS Monaco, nuko Mbappe atizwa Paris Saint-Germain. 

Mbappe akimara gutizwa muri Paris Saint-Germain, yarabiciye biracika, nuko nyuma y'umwaka umwe muri 2018, Paris Saint-Germain ihitamo kumugura burundu, yishyura Miliyoni 38£ muri AS Monaco. 

Mbappe mu gihe yamaze akinira Paris Saint-Germain, yayikiniye imikino 308, ayitsindira ibitego 256, ubu ni we mukinnyi wihariye agahigo ko gutsinda ibitego byinshi muri Paris Saint-Germain, aho akurikiwe za Zilatan Ibrahimovic ukomoka muri Suwede.

Uretse kuba yarabiciye bigacika mu makipe yagiye akinira, Kylian Mbappe ni umukinnyi wo kubahwa mu ikipe y'igihugu y'u Bufaransa.

Muri 2014, ni bwo yabonye amahirwe yo gukinira u Bufaransa mu batatengeje imyaka 17, abakinira imikino ibiri, gusa nta gitego yabatsindiye.

Muri 2016, yakiniye u Bufaransa mu batarengeje imyaka 19, abakinira imikino 11, abatsindira ibitego birindwi. 

Mbappe winjiye mu ikipe nkuru y'igihugu muri 2017, kugeza ubu ni umukinnyi wa gatatu mu bamaze gutsindira u Bufaransa ibitego byinshi. 

Ku mwanya wa mbere hari Guroud Oliver ufite ibitego 57, akurikiwe na Henry Thierry ufite ibitego 51, naho Mbappe Lottin Kylian we ni uwa gatatu afite ibitego 46.

Muri 2018, Mbappe wari uri kubica bigacika muri Paris Saint-Germain, yafashije ikipe y'igihugu y'u Bufaransa kwegukana igikombe cy'Isi cyabereye mu Burusiya, aho u Bufaransa bwegukanye igikombe butsinze Croatia ibitego bine kuri bibiri. 

Mbappe mu myaka yamaze akinira Paris Saint-Germain, ibindi atazibagiranaho ni uko yafashije iyi kipe gutwara ibikombe bitandatu bya Shampiyona, ibikombe bine by'igihugu (Coupe De France), Ibikombe bitatu bya Trophee Des Champions.

Muri 2020, yafashije Paris Saint-Germain kugera ku mukino wa nyuma wa UEFA Champions League, gusa amahirwe ntabwo yamusekeye kuko batsinzwe na Bayern Munich igitego kimwe ku busa.

Uyu rutahizamu yasinye amasezerano y’imyaka itanu azamugeza muri 2029, aho yanemeye kugabanya ku mushahara we.

Bivugwa ko uyu mukinnyi yahembwe miliyoni 63,9 z’Ama-Pounds mu mwaka we wa nyuma harimo n’agahimbazamusyi ka miliyoni 25 ku mwaka.

Muri Real Madrid, Mbappe azajya ahembwa miliyoni 12,8 z’amapawundi ku mwaka havuyemo imisoro.

Uretse kuba Mbappe yungukira mu kuba akina umupira w'amaguru, anabona andi mafaranga menshi aturuka mu kwamamaza. Yamamaza uruganda rw'imyambaro Dior, Orange, Hublot, ndetse n'ibindi.

Kylian Mbappe yamenyekanye akiri muto muri AS Monaco 

Mbappe yatangiye kubica bigacika ageze muri Paris Saint-Germain 

Muri 2018, Mbappe yegukanye igikombe cy'Isi ari kwitwara kumwe nk'ikipe y'igihugu y' Ubufaransa 

Muri Paris Saint-Germain, Mbappe yakinanaga na murumuna we Ethan Mbappe 

Ethan Mbappe ni murumuna wa Mbappe ukinira Paris Saint-Germain 

Mbappe yamaze gutangazwa nk'umukinnyi mushya wa Real Madrid