Ku itariki 25 Gicuransi 2024, Umuholandi, Eric Ten Hag yafashije Manchester United kwegukana igikombe Cya FA Cup atsinze Manchester City ibitego bibiri kuri kimwe. Ibitego bya Manchester United byatsinzwe na Alejandro Garnacho afatanyije na Kobbie Mainoo Boateng, mu gihe igitego kimwe cya Manchester City cyatsinzwe na Jeremy Doku.
Umutoza Eric Ten Hag, yavutse ku itariki 2 Gashyantare mu 1970, yavukiye mu gace ka Haaksbergen mu Buholandi.
Nubwo benshi bamuzi nk'umutoza wabiciye bigacika muri Ajax na Manchester United, Eric Ten Hag yanabaye umukinnyi, aho yakinaga inyuma ku ruhande rw'iburyo ahazwi nko kuri kabiri.
Eric Ten Hag ari umukinnyi yamenyakanye cyane mu ikipe ya Twente yo mu Buholandi, kuko yayizengurutsemo inshuro eshatu, ayivamo akongera akayigarukamo.
Mu mikino Eric Ten Hag yakiniye ikipe ya Twente mu nshuro zose yayizengurutsemo, ni imikino 221, yanayitsindiye ibitego bitanu.
Uwari myugariro Eric Ten Hag, yanakiniye amakipe nka De Graafschap, ayikinira imikino 51, ayitsindira igitego bitandatu.
Ten Hag yakiniye ikipe ya RKC Waarwijk, ayikinira imikino 31, ayitsindira ibitego bibiri.
Indi kipe Eric Ten Hag yakiniye ni Utrecht, yayikiniye imikino 30 ayitsindira ibitego bibiri.
Mu rugendo rwa Eric Ten Hag nk'umukinnyi wabigize umwuga, yarutangiye mu 1989, arusoza muri 2002.Yakinnye imikino 336 atsinda ibitego 15 mu rugendo rwo guconga ruhago.
Eric Ten Hag wari warabaye myugariro w'agatangaza, mu 2012 yatangiye umwuga wo gutoza. Icyo gihe yahereye muri Go Ahead Eagles, aho yayitoje umwaka umwe kuko yayivuyemo muri 2013.
Kuva 2013 kugera 2015 Ten Hag yagiriwe icyizere cyo kuba umutoza wa Bayern Munich ya kabiri, aho amasomo amwe yo gutoza yayigiraga kuri Pep Guardiola watozaga Bayern Munich.
Kuva mu 2015 kugera 2017, Ten Hag yagiye gutoza Utrecht, aho yayivuyemo yerekeza muri Ajax.
Eric Ten Hag akigera muri Ajax yabaye umutoza udasanzwe, kuko ku gihe cye, yayimuritse mu marushanwa akomeye ku Mugabane w'u Burayi. Muri 2022 Eric Ten Hag watozaga Ajax, yatandukanye nayo ajya gutoza Manchester United akaba ari nayo atoza kugeza ubu.
Akigera muri Manchester United, Eric Ten Hag yaranzwe no kutavugirwamo, ahera ku bakinnyi bakomeye barangajwe imbere na Cristiano Ronaldo arirukana.
Mu mwaka we wa mbere muri Manchester United, Ten Hag yatwaye igikombe cya Clabao Cup, yafashije Manchester United gusoreza ku mwanya wa Gatatu muri English Premier League, ndetse anayifasha kugera muri kimwe cya Kane muri Europa League.
Umwaka wa Kabiri muri Manchester United wabaye mubi kuri Ten Hag, kuko yananiwe kurenga amatsinda ya UEFA Champions League, asoreza ku mwanya wa Munani muri English Premier League, gusa gikomeye ni uko yafashije iyi kipe kwegukana FA Cup itsinze Manchester City, bikaba byayihaye amahirwe yo kuzitabira Europa League.
Nta mwaka wo gupfa ubusa kuri Eric Ten Hag, kuko mu myaka ibiri amaze muri Manchester United ayihaye ibikombe bibiri
Akiri umukinnyi, Eric Ten yakiniye ikipe ya Twente
)