Amakipe 8 atarimo iyo mu Rwanda niyo ari butangirire gukina imikino ya nyuma ya 1/4 cya African Basketball League 2024 mu nzu y'imikino n'imyidagaduro ya BK Arena.
Ni imikino iri butangire gukinwa kuri uyu wa Gatanu taliki ya 24 kuzageza taliki ya 1 Kamena. Amakipe 8 ari buyikine ni ayavuye muri za Conference 3 arizo Kalahari, Nile ndetse na Sahara.
Byinshi kuri aya makipe ari butane imitwe arwanira igikombe cya BAL 2024
Association Sportive des Douanes
Iyi kipe ni iyo mu gihugu cya Senegal, benshi bakaba bayizi nka AS Douanes. Yashinzwe mu 1980, ikaba iyoborwa n'inzego za gisirakare aho Perezida wayo ari Colonel Cheikh Diop.
AS Douanes niyo kipe ikina Basketball ifite ibikombe byinshi muri Senegal bigera kuri 35 . Iyi kipe mu mikino ya BAL kure yageze ni ku mukino wa nyuma mu mwaka ushize, gusa byarangiye itsinzwe mu gihe mu 2021 ari bwo bwa mbere yakinnye imikino ya 1/4 cya BAL.
Union Sportive Monastirienne Basketball
US US Monastir ni ikipe yo muri Tunisia, yashinzwe mu 1959 ikaba imaze kwegukana ibikombe 8 bya shampiyona.
Iyi kipe itozwa n'umutoza ukomoka mu gihugu cya Misiri wanabayeho umukinnyi witwa Mohamed Kardani, ikaba yakirira kuri Mohamed-Mzali Sports Hall Arena ifite ubushobozi bwo kwakira abantu ibihumbi 5.
US Monastir yatangiye gukina BAL muri 2021 ihita igera ku mukino wa nyuma, gusa birangira itsinzwe ariko mu mwaka wakurikiyeho ihita yegukana igikombe.
Fath Union Sport Basketball
Iyi kipe ni iyo muri Morocco mu gace ka Rabat, ikaba yarashinzwe taliki 10 Mata 10 mu 1946. Yatwaye igikombe cya 1 mu 1968 nyuma y'imyaka 22 ishinzwe gusa kugeza ubu imaze gutwara ibikombe 18 bya shampiyona muri rusange.
FUS Rabat isanzwe yakirira imikino yayo muri Salle Abderrahmane Bouânane Arena ifite ubushobozi bwo kwakira abantu ibihumbi 1,500. Ni ubwa mbere yari yitabiriye imikino ya BAL none yahise inabona itike yo gukina 1/4 ivuye muri Sahara Conference.
Petro De Luanda Basketball Club
Ni ikipe yo mu gihugu cya Angola mu gace ka Luanda ikaba yarashinzwe mu 1980. Petro De Luanda Basketball Club niyo kipe ya kabiri imaze kwegukana ibikombe bya shampiyona byinshi muri iki gihugu bigera kuri 16.
Iyi kipe kandi muri 2005 no muri 2005 na 2015 yakoze akazi gakomeye yegukana FIBA African Champions Cup. Muri BAL ya 2021 yabaye iya 3, naho mu 2022 iba iya 2 mu gihe iyo mu mwaka ushize yabaye iya 4.
Al Ahly Basketball Club
Al Ahly Basketball Club ni iyo mu gihugu cya Misiri mu murwa mukuru i Cairo. Yashinzwe mu 1930, ikaba iri mu makipe akuze mu Misiri ndetse no muri Afurika muri rusange.
Iyi kipe isanzwe yakirira imikino yayo muri Al Ahly Sports Hall Arena ifite ubushobozi bwo kwakira abantu 1,500. Imaze gutwara ibikombe 9 bya shampiyona ndetse ni nayo ifite igikombe cya BAL iheruka ya 2024.
Al-Ahly Sporting Club
Iyi kipe ni iyo mu gihugu cya Libya ikaba yarashinzwe mu gace ka Benghazi mu 1950. Kuva yashingwa imaze gutwara ibikombe 3 bya shampiyona mu gihe muri uyu mwaka ari ubwa mbere yari yitabiriye imikino ya BAL none yahise inabona itike ya 1/4.
Cape Town Tigers
Iyi kipe ni iyo muri Afurika y'Epfo mu gace ka Cape Town ikaba yarashinzwe muri 2019. Kugeza ubu imaze gutwara ibikombe 3 bya shampiyona mu gihe muri BAL.
Rivers Hoopers Basketball Club
Rivers Hoopers ni ikipe yo muri Nigeria mu gace ka Port Harcourt, Rivers, ikaba yarashinzwe muri 2005 yitwa Royal Hoopers gusa nyuma muri 2015/6, ihindura izina.
Kuva yashingwa imaze gutwara ibikombe 5 bya shampiyona. Muri 2019 ni bwo yitabiriye imikino ya BAL gusa nyuma yaho ntabwo ibintu byagenze neza kuko ubu ni bwo yongeye kubona itike none yageze no muri 1/4.
Muri aya makipe nta n'imwe yo mu Rwanda irimo nyuma y'uko APR BBC itashoboye kubona itike iyikura muri Sahara Conference ngo igere muri 1/4.
Biteganyijwe ko imikino ya 1/4 cya BAL 2024 itangira ikipe ya Al Ahly Ly ikina na Cape Town Tigers saa kumi n'imwe mu gihe saa mbili Al Ahly iri bukine na Fath Union Sports de Rabat.
Eng
RSS 
TANGA IGITECYEREZO