Abakinnyi 11 beza ba Shampiyona y'u Rwanda 2023-24

Nyuma yaho shampiyona y'icyiciro cya mbere mu Rwanda umwaka w'imikino 2023-24 ishyizweho akadomo yegukanwe na APR FC, InyaRwanda yabateguriye ikipe y'abakinnyi 11 beza baranze iyi shampiyona yaranzwe n'ihangana ry'amakipe yarwanaga no kutamanuka.

Aba bakinnyi bakaba batoranyijwe n'itsinda rigari ry'abanyamakuru ba siporo, hagendewe ku musaro w'umukinnyi ku giti cye, imikino yakinnye n'uruhare yagize mu musaruro w'ikipe akinira,

Pavelh Ndzila

Uyu ni umunyezamu wa APR FC akaba ari umwaka wa mbere yari akiniye iyi kipe ibitse igikombe cya shampiyona. Pavelh yabaye umunyezamu mwiza muri APR FC ndetse agira imikino yatabayemo iyi kipe harimo nk'umukino ubanza wa shampiyona bahuyemo na Mukura Victory Sports, ndetse akaba ari umwe mu banyezamu bakinnye imikino myinshi muri uyu mwaka w'imikino.

Ombolenga Fitina

Ni umwe muri ba myugariro bamaze igihe muri shampiyona y'u Rwanda by'umwihariko mu ikipe ya APR FC. Uyu mukinnyi usibye kuba afasha ikipe ya APR FC gutsinda, agira n'uburinzi bwiza butuma igihe cyose aba ari muzima APR FC yamwitabaje.

Niyigena Clement

Nyugariro w'ikipe ya APR FC ari mu bakinnyi bakinnye imikino myinshi muri iyi kipe. Clement wasangaga umutoza Thierry Froger ari we yari yizeye mu mutima w'ubwugarizi, ndetse akaba ari mu bakinnyi bafashije APR FC kurangiza shampiyona idatsinzwe.

Bakaki Shafiki

Myugariro w'ikipe ya Musanze FC, yakinnye imikino 27 muri shampiyona, aba umukinnyi ngenderwaho mu bwugarizi bwa Musanze FC ndetse akaba ari mu bayifashije kugera ku mwanya wa 3.

Ishimwe Christian

Myugariro wa APR FC ukina inyuma ibumoso. Uyu musore yatangiye umwaka w'imikino ahanganiye umwanya na Niyomugabo Claude, ariko yaje kugaragaza kwiganza kuri uyu mwanya kugera aho Niyomugabo Claude bamwohereje imbere. Christian mu bakinnyi bakinaga ku mwanya umwe muri iyi shampiyona, ubona ko yari mu bakinnyi biganje cyane.

Nduwayo Valeur

Urebye mu bakinnyi bakinnye mu kibuga hagati nka Nimero 6, usanga uyu musore wo muri Musanze FC yari hejuru cyane. Shampiyona yatangiye ubona atari umwe mu bakinnyi bo kwitega kuri uyu mwanya, ariko imikino 26 yakinnye yatumye aba umukinnyi wakinnye iyi mikino kuri ba nimero 6 ndetse no kugeza ikipe ku mwanya wa 3 bwa mbere, bikaba biri mu byatumye yiganza kuri uyu mwanya.

Muhire Kevin

Kuva yagera muri Rayon Sports yerekanye itandukaniro ndetse aza kuba umukinnyi kizigenza burundu nyuma yaho Luvumbu Nzinga yari amaze kuva muri iyi kipe.

Rukundo AbdulRahman

Ni umukinnyi ukina mu kibuga hagati mu ikipe ya Amagaju  FC ukomoka mu gihugu cy'u Burundi. Uyu musore wari ukinnye bwa mbere shampiyona y'icyiciro cya mbere mu Rwanda, yabaye umukinnyi ngenderwaho, kuko umunsi Amagaju FC yakinnye atamufite byahise bigaragara.

Ani Elijah

Uyu rutahizamu wa Bugesera FC yabaye ishyiga ry'inyuma muri iyi kipe y'i Burasirazuba bw'u Rwanda. Uyu musore na we watsinze ibitego 15 afite uruhare rwa 40% rw'ibitego ikipe ya Bugesera FC yatsinze muri uyu mwaka w'imikino.

Richard Bazombwa Kirongozi

Umukinnyi wa Kiyovu Sports ukina aca mu mpande nka nimero 7, yabaye inkingi ya mwamba ya Kiyovu Sports byaba mu mikino yakinnye ndetse n'ibitego 8 yatsinze, bisanga imipira 6 ivamo ibitego yatanze. Umusore wagaragaje umuvuduko udasanzwe, afatwa nka nimero 7 nziza yagaragaye muri iyi shampiyona irangiye.

Hakizimana Muhadjri

Wamubonaga neza mu gihe ikipe ya Police FC yabaga ifite umupira imbere y'izamu, passe zerekeza ahantu utacyekaga, biri mu byatumye uyu mukinnyi aza mu bakinnyi beza ba shampiyona. Uyu mwaka w'imikino ushize Hakizimana Muhadjri atsinze ibitego 9 n'imipora 7 ivamo ibitego.

Iyi kipe y'abakinnyi 11 bitwaye neza muri shampiyona, InyaRwanda yayihaye umutoza Thierry Froger wari umutoza wa APR FC, akaba yungiijwe na Sosithene Habimana.